وجلست ملك على الكرسي أمام مكتبه, ليقول لها وتلك الابتسامة المستفزة تأبى أن تغادر وجهه: زي مانا شايف, انتي ما خيبتيش توقعاتي.
فسألته ملك وقد اجتاحها اليأس من سماع نبرته الواثقة: انت عاوز مني ايه بالظبط؟
عمرو مدعيا عدم الفهم: افتكر انا اللي المفروض اسألك السؤال دة بما انك انتي اللي جاية هنا لحد عندي.
ثم ثبت كرسيه وأمال بجزعه للأمام ليقول بلهجة كالصقيع: انا قولتك ع اللي انا عاوزه.
فسددت اليه ملك نظرة اتهام وهي تهتف به: ودة يخليك ترمي راجل بريء في الحبس وتلفقله تهمة زور؟
فقال عمرو بنبرة غير مبالية وهو يشبك أصابع يده فوق مكتبه: بيقولوا الغاية تبرر الوسيلة.
ملك مستفسرة: طب وآخرة دة كله ايه؟ تفتكر هتبقا مبسوط اوي وانت شايف أشرف بيترمي في السجن بتهمة هو ما عملهاش ووالدته المريضة ممكن تروح فيها؟
عمرو ببرود: بايدك تجنبيهم كل دة.
فتساءلت ملك بحيرة: انا نفسي أعرف اشمعنى انا بالذات وانت فيه مليون واحدة تتمنى انك تعرض عليها العرض وتوافق انها تبقا مراتك العمر كله مش بس سنة؟
لم يرد عمرو أن يريحها ويجيب عن تساؤلها, بل عوضا عن ذلك قرر اتباع الحكمة التي تقول (اطرق على الحديد وهو ساخن): افتكر ان براءة أشرف اولى باهتمامك من الامور دي.