هنا وبدأت دموعها تتساقط بلا هوادة وملك لا تملك سوى ان تربت على كتفها بحنان تحاول مواساتها: طب اهدي بس يا عزة وخلينا نفكر هنعمل ايه؟ او هنتصرف ازاي؟
فقالت عزة من بين دموعها: مش مصدقة اللي حصل يا ملك؟ بقا أشرف يتهموه تهمة زي دي؟ دة عمره ما بص لحاجة مش بتاعته.
كانت ملك تعلم ذلك جيدا وهي تشك في حقيقة هذا الأمر وتعلم أن هناك سرا, ثم سألت عزة: طب انتوا كلمتوا محامي؟
فهزت عزة رأسها بالايجاب وهي تقول: اه عمي راح لواحد بس قاله ان القضية صعبة وهتحتاج وقت لحد ما يقدروا يثبتوا براءته.
فقالت ملك مطمئنة إياها و تحاول أن تبث الأمل بداخلها بينما كانت هي نفسها بحاجة إلى ذلك: ان شاء الله خير, وهيطلع منها في أقرب وقت.
ثم تلفتت حولها وهي تتساءل: أمال ماما فين؟
عزة: في اوضتها, منهارة من ساعة اللي حصل, الله يكون في عونها وعوننا.
ملك: طب ممكن أدخلها؟
عزة: آه طبعا, بس ثواني هشوفها صاحية ولا لا؟
وذهبت عزة لتخبر والدتها برغبة ملك في لقائها, وما كانت إلا لحظات حتى وصلها صوت السيدة تقول بنبرة حاقدة: وهي البومة دي جايالنا ليه تاني؟ مش كفاية اللي حصل؟ دة احنا من يوم ما عرفناها وما شوفناش يوم حلو, ما تحل عن سمانا بقا يمكن ربنا يكرم ابني ويطلع من المصيبة اللي هو فيها.