نظرت “هدى” حولها بقلق ثم تمتمت بنبرة خبيثة هادئة:-
_ لو سمعت اللى عندي يا بيه هتفضي ليا مخصوص
_ أرغي
قالها بحدة صارمة فتابعت الحديث بنبرة جادة قوية مُصطنعة الصلابة أمامه:-
_ وهتديني حلاوتي لما أقولك اللى عندي
رفع حاجبه بتوتر ثم حك ذقنه بأنامله ثم قال بهدوء:-
_ على حسب لو اللى عندك هيفيدني ولا لا
أقتربت الخادمة خطوة منه بشجاعة ثم وضعت يدها على كتفه بسخرية وقالت:-
_ هينجيك من الموت
أندهش من كلماتها وأخفض من حدته حين قال بهدوء:-
_ أرغي يا بت
_ أنا كنت جاية أقولك أن الست مريم جت للبيه الكبير الصبح وقالتله أن حضرتك اللى بعت الرجالة يقتلوه أخوك محمد بيه وأديته الدليل وكمان جابت الخادمة اللى اسمها مديحة وقالتله أن أنت اللى خليتها تحط السم فى أكل أنسة آيلا عشان تخلص منها والبيه الكبير صدقها بالدليل
قالتها بمكر شديد مما جعل “محمود” ينتفض فزعًا من تصرف أخته وهكذا أتسعت عينيه على مصراعيها من الصدمة التى ألجمته من مكر أخته وهى تضحي به حتى تنجو هى بحياتها، أتاهما صوت زوجته من الخلف تقول بذعر:-
_ أى…. إنتِ بتقولى أى يا بت إنتِ ؟
_والله يا هانم زى ما بقولك…. هتحليلي بوقي يا بيه
قالتها “هدي” بحماس قوي مما جعل “محمود” يكاد يفقد أعصابه أكثر فسحبها من ذراعها بقوة إليه وقال بنبرة تهديدية مُرعبة وخشنة:-
_ عارفة يا بت لو طلعتلي بتكذبي هعمل فيكِ أى؟