لم تستطع الرد، وكأن الكلمات تحجرت في حلقها، فانفجرت بالبكاء، تحاول التحدث من بين شهقاتها
“يعني أقاطع أهلي؟!، أنا غلطانة ومش هانكر، واستاهل كل كلمة قالها أخويا ليا، أنا مش ذنبي إني بنت لأب مستهتر وكل همه نفسه ويضيعنا معاه… بس أنا كنت مضطرة أتجوز الحيوان ده عشان بابا”
رد عليها بغضب محتدم
“ومكنش ده الحل الوحيد اللي عملتيه، وفي نفس الوقت مش هقدر ألومك؛ لأنك كنتي صغيرة وقتها، بس العيب مش عليكي… العيب على أبوكي، وعلى الو… اللي استغل ظروفك واتجوزك عرفي، وصورك وإنتي معاه عشان يستغلك بعدين”
مسحت دموعها بيدها وقالت بانكسار
“واللي حصل، حصل خلاص، أنا دلوقتي كل همّي ماما، ماما ما تستاهلش مني أي حاجة وحشة، خايفة عليها من الصدمة يحصلها حاجة، مش هاينفع أسيبها، لازم أكون جنبها”
نظر إليها بحزم لا يقبل النقاش
“إنتي انسي تروحي بيتكم، أنا هابقى أطمنك عليها وهاخد بالي منها”
رمقته باستفهام حائر
“تطمني عليها!، قصدك إيه؟”
ظل ينظر إليها لثوان ثقيلة قبل أن يقول
“اعملي حسابك… كام يوم وهتسافري معايا”
شهقت بدهشة
“هسافر؟!”
“آه، هتسافري معايا على إيطاليا، وهخلصلك دلوقتي حوار الباسبور، بس قبل السفر عندي مشوار هاخلصه، وبعدها هاكتب عليكي ونسافر”