دلف إلى غرفته الواسعة، وتقدم حتى وقف خلف مكتبه، ذلك المكتب الذي طالما شهد قراراته الحاسمة وتقلبات مزاجه، فابتسم إليها ابتسامة مقتضبة قائلاً
“الله يسلمك”
ثم أدار نظره في أرجاء المكان، يتفحص كل زاوية وأردف بنبرة تجمع بين المزاح والدهشة
“واضح بقالي كتير ماجتش”
ابتسمت المساعدة ابتسامة عملية، وأجابته
“أيوه يا فندم، بس ما تقلقش، حضرتك الشغل ماشي زي الساعة، البركة في مدام شيري متابعة كل حاجة، ومستر طارق مدير قسم الماركتينج كان بيباشر كل حاجة بنفسه، وبيبعت لمدام شيري كل التقارير”
همس بصوت خافت، وقد تسللت السخرية إلى نبرته
“أخيرًا شيري هانم لاقت حاجة مفيدة تعملها”
رفعت المساعدة حاجبيها قليلًا، وسألته باستفهام
“بتقول حاجة حضرتك؟”
انتبه لسؤالها، فهز رأسه نافيًا وقال بسرعة
“ما تاخديش في بالك… حضرتيلي الملفات اللي قولتلك عليها في التليفون عشان أراجعها؟”
أجابت بثقة
“الملفات جاهزة يا فندم، بس قبل المراجعة، مستر طارق جهز لاجتماع مع الموظفين الجدد”
عقد ما بين حاجبيه، وسألها باستغراب
“إنتوا عينتوا ناس جديدة إزاي من غير ما تبلغوني؟”
وارتفعت نبرة صوته حدة دون أن يشعر، فتبدلت ملامحها إلى شيء من الحرج، وسارعت توضح
“مستر طارق كان محتاج أربع موظفين جداد في قسم الماركتينج عنده، كلم حضرتك ومكنتش بترد عليه، فبلغ مدام شيري ونزل إعلان، واتقدم لينا حوالي عشرين بنت وشاب، الـ HR عمل معاهم إنترڤيو، وقبل أربعة منهم هم اللي هاينفعوا”