ملامحه جامدة في ظاهرها، غير أن عينيه كانتا تضجان بحكايات انهكت فؤاده، بداية من تشبثه بأحبال آمال واهية حتي سقوطه في وادي من الخيبات، تركت آثار ستظل محفورة في ذاكرة قلبه وعقله.
إلى جواره وقفت أمه، تأملته طويلًا، تحفظ تفاصيله للمرة الأخيرة، لأنها تعلم تلك الرحلة ستكون طويلة كما اخبرها، قالت بصوت حاولت أن تجعله ثابت، ترجوه للمرة الأخيرة
“فكر تاني يا رحيم وبلاش هروب، والله ببلدك اولى بيك يا حبيبي، علي الاقل هاتكون وسط ناسك وأهلك”
التفت إليها ببطء وفي عينيه اتقدت نار هادئة؛ نار رجل حسم أمره منذ زمن، فاخبرها بهدوء
“يا أمي… أنا مش بهرب، ولا سايب بلدي عشان اللي حصل معايا، بس ده أنسب وقت للسفر، أنا محتاج أكرس حياتي لشغلي و مستقبلي، هو ده اللي هاينفعني و هايخليني اتعافي من اللي فات”
تنفست بعمق، كأنها تحاول ابتلاع غصة ثم هزت رأسها ببطء، وقالت بصوت تغلفه الحسرة
“بس هنا كمان تقدر تتحقق كل ده… و أنا جنبك”
ارتسمت على شفتيه ابتسامة شاحبة، ابتسامة تولد من رحم الوجع
“الفرصة اللي جاتلي هناك مش سهلة، ولو سيبتها هافضل طول عمري ندمان، عشان خاطري يا ماما بلاش تضغطي عليا، لو بتحبيني سيبيني اعمل اللي أنا عايزه و مرتاح فيه”