“بصي يا خديجة، الموضوع الحمد لله مش مستحيل، ليه علاج بس هياخد وقت، لأن اللي فهمته إنه كان عنده مشكلة قديمة واتعالج منها، والمفروض كان يستمر على العلاج، بس واضح إنه وقفه وما سألش، فالمشكلة رجعت وبقت أصعب شوية”
تنفست الأخرى بعمق، قائلة برضا وحزن معاً
“وأنا مش زعلانة، وراضية الحمد لله لو ربنا ما أرادش لينا نخلف تاني، أنا كل اللي مزعلني… ليه يخبي عليا؟!”
تنهدت علياء و تُفكر بصوت مسموع
“هو وارد جدًا واحتمال كبير إنه مش عايزك تزعلي لو كنتي نفسك تخلفوا تاني، لحد ما تتعالج عنده المشكلة ويمكن كمان، وده احتمال أكيد إن الموضوع بالنسبة له حساس جدًا، وأنا برجح الاحتمال التاني”
نظرت الأخرى بحيرة ظاهرة، وكأن ذكرى مباغتة ضربت وعيها فجأة، فقالت بلهجة يغلب عليها اللوم الذاتي
“وأنا غبية، طول الفترة اللي فاتت وأنا عمالة أضغط عليه وأقوله عايزين نجيب أخ أو أخت ليوسف، وهو كان يتضايق وأوقات يتخانق معايا”
أجابتها بنبرة حاسمة مشفقة
“الحل يا ديجا إنك تاخدي جوزك وتطلعوا على أي مكان حلو، تقضوا فيه يومين حلوين، وتخرجوا بره جو الضغوط النفسية، حوار السفر والترفيه بيبقى دعم نفسي إيجابي جدًا، سواء ليه أو ليكي”
ارتسمت ملامح التفكير علي وجهها وتستعيد حديث سابق