ارتسمت على شفتي الأخرى ابتسامة صادقة، تشبه انفراجة ضوء في قلب غيمة، وقالت بترحاب واضح
“أهلًا أهلًا، إيه المفاجأة الحلوة دي؟”
اقتربت منها وعانقتها بحفاوة، عناق دافئ يحمل شوق مكتوم فبادلتها خديجة العناق وهي تقول بنبرة عتاب محب
“حبيبتي يا لولو، وحشاني ياللي ما صدقتي سيبتيني، ولا كأننا عشرة سنين عايشين مع بعض في بيت واحد”
جلست على المقعد القريب، فجلست علياء على المقعد المقابل لها، وأسندت ظهرها قليلًا، وقالت بصوت تختلط فيه المرارة بمحاولة التماسك
“أبدًا يا ديجا والله، بالعكس ربنا يعلم بحالتي النفسية، وإنتم شهدتوا وسمعتوا بودانكم اللي حصلي من البني آدم اللي استحملت منه حاجات كتير، وفي الآخر يتهمني بالتهمة البشعة دي، ولا كأن ما بينا حب سنين وجواز”
رمقتها الأخرى بنظرة مثقلة بالحزن والأسف، وقالت بنبرة صادقة
“مش بلومك يا حبيبتي، معاكي كل الحق، للأسف الشيطان دخل ما بينكم من سكة صعبة، والله بدعيلكم على طول ربنا يصلح ما بينكم، على الأقل عشان خاطر الأولاد، سواء لوجي اللي انتي ربيتيها زي بنتك وأكتر، أو عز الدين أكيد هيتأثر بالخلافات اللي بينك وبين باباه”
انسابت نظرات علياء نحو الفراغ، كأنها تهرب من الحقيقة، تكبت دموعها بصعوبة كلما تذكرت اتهامات زوجها الباطلة، وموقفه القاسي معها أمام عائلته، حيث انكسرت كرامتها على مرأى ومسمع الجميع.