على : أكيد اتفضلي ^^
داليا : ممكن بكره إن شاء الله تجيب معاك اي ذكري بينا يعني الورود والجوابات والهدايا لو لسه موجوده عندك يعني ؟
على : طبعاً كل حاجه لسه موجوده بس ليه يعني عوزاهم ليه ؟؟!
داليا : هتعرف بكره ان شاء الله بس ارجوك يا علي تجيبهم معاك كلهم وماتتأخرش بكره
على : حاضر
داليا : اشوفك بكره بإذن الله ، مع السلامه
على : خدي بالك من نفسك ، مع السلامه
استنى لما قفلت وبص للموبايل وهو مش مصدق انه من شويه كان بيكلم داليا ، لسه صوتها بيتردد في ودنه ، حضن الموبايل والبسمه مرسومه على شفايفه ، ركب عربيته ورجع ع البيت فضل يقلب في هدومه ويقيس في كل القمصان وشويه يجرب البدل وفي الآخر قرر يلبس القميص إللي داليا جبتهوله هديه ، كواه وجهز كل هدومه ، رمى نفسه ع السرير وسرح في السقف ولسه سامع صوتها في ودانه فضل شارد في ملامحها لحد ما نام …..
~
~
~
داليا من بعد ما قفلت مع علي وهي شارده ، مددت جنب هنادي ولارا ومش جايلها نوم ، خايفه من مقابلة بكره أوي ، خرجت من الأوضه ولقت عادل وأحمد قاعدين في البلكونه
داليا : الله الله سهرانين لحد دلوقتي ليه يا أساتذه !
عادل : مش جايلنا نوم فـ بنتسلى شويه ، تعالي ألعبي معانا
داليا : أوكشن هروح أعملنا دور شاي وأجي أقطعكم