رفعت علياء راسها ، سالت دموعها ومن غير كلام إترمت فـ حضن داليا وإتفتحت فـ العياط وداليا معاها 
علياء : سامحيني يا داليا والله جوزي كان عامل حادثه مقدرتش أكون جنبك فـ أصعب وقت فـ حياتك
داليا : أنا كنت متأكده إن فيه حاجه كبيره مانعاكي يا حبيبتي عشان كده ما زعلتش منك 
كنتي وحشاني أوي يا عليا
علياء : وإنتي كنتي وحشاني أكتر يا روح قلب عليا
فضلوا يحكوا شويه وعلياء كل ما تتكلم عن الحادثه داليا تغير الموضوع مش عاوزه تتكلم فيه ولا عاوزه تحكي لأي حد عن تفاصيل الحادثه وإللي حصل يومها وعلياء راعت ده لذلك ماضغطتش عليها ولا ألحت فـ سؤالها
شويه ودخلت خديجه ومعاها أحمد ، فرحت داليا لما شافت أحمد كان بقالها فتره ما بتشفهوش ضمته لحضنها وسألته عن دراسته وفكرته بوعده ليها إنه مهما حصل هيشد حيله ويتفوق عشان يحقق حلمه وحلمها :’))
سألت داليا أمها : أمال بابا فين يا ماما ؟! مابشفهوش خالص واحشني أوي !
إرتبكت خديجه وبصت فـ الأرض : كويس الحمدلله يا حبيبتي هو جالك قبل كده بس كنتي نايمه يعني فهو هو هيجي إن شاء الله هيجيلك
وقبل ما يكملوا كلامهم إتصل ناصر أخو خديجه علي موبايل علياء ردت وناولت الموبايل لداليا ، صوته كان واحشها أوي ، داليا وخالها زي الأصحاب قريب منها ودايماً تستشيره فـ كل حاجه بتعملها :’))