عمران : طيب روحوا وإقفلوا الباب وراكم
بصتله بأسي ، تأملت الأوضه بحسره .. قفلت الباب وقعدت تستني علياء فـ الصاله
وصلت علياء وركبت معاها خالتها وأحمد وراحوا ع المصحه
.
.
.
داليا كانت بترسم لما دخلت عليها دكتوره نِهال
نِهال : إزيك يا داليا
من غير ما تلتفتلها وهي بترسم : الحمدلله
نِهال : أنا زي ما وعدتك أهه مفيش جلسات ولا هاجي أزعجك لحد ما تخلصي اللوحات
داليا : بس أنا لسه ماخلصتش
نِهال : ما أنا عارفه أنا جيت أطمن عليكي وأقولك إني كلمت الضابط قريبي إللي حكتلك عنه
وقفت داليا رسم وبصتلها : وقالك إيه ؟!
نِهال : لأ أنا لسه ما إتكلمتش معاه أنا رايحه بكره إن شاء الله يعني عشان احكيله بالتفصيل ، داليا إنتي متأكده إن ده قرارك النهائي ؟!
سابت داليا اللوحات وقفت عند الشباك وبصت للسما شويه ، إتنهدت وإلتفتت لـ نِهال إبتسمت ولمعت عيونها :’)) وردت :
أبويا فـ يوم قالي (( شرف البنت زي عود الكبريت ما يولّعش غير مره واحده ))
أنا عود كبريت بس هم إللي بدأوا وولّعوا ناري وأنا أقسمت إني مش هنطفي غير وأنا حرقاهم زي ما حرقوا قلبي ودبحوني ……
ما تقلقيش يا دكتور أنا مش هرجع عن قراري ده نهائياً تقدري تكلمي قريبك وتبدأي أي إجراءات وإنتي مطمئنه أنا خلاص مش هسكت تاني وهاخد حقي وحق كل بنت زيي !