+
ترددت الجملة الأخيرة بعقله أكثر من مرة، للمرة الأولى تبوح بمثل هذا الاعتراف الذي يدل على كثرة تعرضها للخذلان، فنطق بدعم:
_” صدقيني انتِ قوية من غير حد ”
+
نفت على الفور تستفيض ببكاء:
_” لا مش قوية خالص، هي كمان كانت فكراني قوية، بس لا، ماكانش ينفع تفكر كدة ولا تمشي وتسيبني، أنا كنت صغيرة ومحتاجاها معايا، هو أنا ماصعبتش عليها؟… ليه سابتني؟ ”
+
فهم أنها تتحدث عن والدتها الراحلة فحاول احتوائها بكلمات ينتقيها جيدًا:
_” أكيد ماكنتش عايزة تسيبك، اللي يحبك عمره ما هيتخلى عنك ويبعد بإرادته ”
+
هزت رأسها يمينًا ويسارًا تستنكر كلامه وهي تردد بهيستيريا:
_” مفيش حب، ما ينفعش نآمن بالحب، هو كمان كان بيقول انه بيحبها بس خانها وسابها تموت…. حتى مالك قال انه بيحبني وبرضو طلع كذاب ومخادع، طب تعرف يا راجح، مش انا بكره تحكماتك؟…. بس مطمنة إنك واضح معايا مش بتكذب ولا بتتظاهر بحاجة وفي قلبك حاجة تانية ”
+
ابتسم لها بهدوء وتنهد يقول بمهاودة:
_” طب ممكن تهدي وتتنفسي براحة، أنا معاكِ حتى لو كل دقيقة طلبتي مني أسيبك مش هسيبك ”
+
تعمد قول ذلك ليغيظها وبالفعل لوت فمها بضيق وهي تمسح دموعها بينما تغمغم: