مش خوفًا منهم، قد ما هو خوف من اللحظة نفسها
من إن حد يشوف ضعفي، أو إن الحقيقة تطلع فجأة وأنا مش مستعدة لها.
وقفت أراقب من بعيد، قلب بينقبض وعقلي بيحاول يلملم الصورة
ليه كل دول هنا؟
إيه اللي وصل الأمور للدرجة دي؟
وإزاي لحظة واحدة قلبت البيت لـساحة مواجهة؟
وكان واضح…
إن اللي بيحصل ده مش مجرد خناقة عابرة ده انفجر فجأة
وإحنا كلنا واقفين في وش العاصفة.
— بنتك يا حاج ملهاش مكان هنا خلاص
جوزها مـ.ات والحكاية خلصت عند النقطة دي.
تقعد لنا هنا ليه؟
هو أنا أقدر أقعد في مكان وهي في نفس المكان؟
يعني إيـه تقعد في شقة حبيبي وابني الوحيد
وتتهنّى في عِزّه وهو يا حبة عيني راح مـ.ات
أهو أنا قلبي اتحرق مش مستعدة أشوفها قدامي وأفتكر وجعي كل يوم.
ردّ بابا بصوت أقل حدّة:
— قدَر ونصيب…
وأنا ذنبي إيه؟ أنا جوزت البِت وريّحت نفسي من الهم
وأقول خلاص أدينا سترنها
تقوم راجعة لي تاني ومصيبة فوق دماغي؟
نفَسُه تقيل وصوته علي شوية: مين هيرضى يتجوز واحدة
جوزها مات ليلة فرحهم؟
قوليلي حد هيمد إيده؟
حد هيغامر؟
سكت لحظة وبص حواليه كأنه شايف المستقبل بيقفل باب باب:
— هيبقى لزمتها إيه قعدتها معانا؟
أنا لسه ورايا بنات عايزين يتجوزوا، عايزين حياتهم تتبني