_ أنا عارفة إنه مش حرام وإنه جوزك..
+
كلامها كان مفاجئًا لخلود التي رفعت عينيها ونظرت إليها في ذهولٍ غير مُصدقة ما تسمعه أذنيها، فلقد توقعت أن تهدم تلك الغرفة رأسًا على عقِب، بينما استشفت هناء ما يدور في رأسها فتابعت مسترسلة:
_ عارفة إنك مستغربة كلامي، عشان توقعتي رد فعل مبالغ عن كدا، متفكريش إن تصرفاتي الحازمة معاكم قِلة حب مني أو إني عايزة أسيطر عليكم..
أنا أمكم ومش عايزة أي حد منكم يشيل ذنب هو مش قده، إحنا مش قد النار يابنتي
كان كل تفكيري وأنا بربيكم إني أمنع عنكم الغلط عشان تطلعوا ولاد صالحين
وللأسف طريقتي كانت غلط وخليتكم تهربوا وتعملوا الغلط من ورايا عِند فيا..
+
أخرجت بعض الأنفاس الحبيسة قبل مواصلتها:
_ أنا مش عايزاكي تتمادي مع وليد، أيوا هو مش حرام بس حضن برئ هيجُر حضن مش بريء، لمسة مش بريئة، كلام وحركات خارجة ودا مش صح أبدًا
البنت لازم تحافظ على نفسها وتكون عفيفة، عشان بعد ما تدخلي بيته ميجيش مع كل مشكلة يعايرك إنك كنتي سهلة معاه..
دا غير إنك لما بتحطي حدود بتخلقي حاجتين في علاقتكم، أول حاجة إنك بتجبريه يحترمك وميتعداش حدوده
وتاني حاجة إنه يكون ملهوف عليكي طول الوقت لأنه مش طايل منك حاجة ولهفته دي تزود حبه ليكي..