اقتربت منه أحلامه بملامح متوترة حزينة وأردفت:
_ أنا مش عايزة أكون سبب إن حياة حد تبوظ..
دنا منها قاسم وملس بيده على وجهها وهتف كلماته الحنونة ليُطمئن قلبها الجميل:
_ أنتِ ملكيش أي علاقة بالموضوع صدقيني، بعيد أوي عنك يا أحلام، لو فكرنا فيها يعني..
اطمني يا حبيبتي أنا هروح دلوقتي وهاجي الصبح وهقولك السبب عشان تطمني..
أسرعت أحلام في رفض عودته مُعللة:
_ لا خليك جنبه، مش لازم تيجي لغاية ما يكون كويس..
ضاق قاسم بعينه معاتبًا إياها بنظراته ثم لامها بلطفٍ:
_ لحقتي تزهقي مني؟
اتسعت حدقتيها بذهولٍ ونفت ذلك بقولها:
_ لا طبعًا، بس أنت لازم تكون جنب ابنك في ظروفه دي..
_ ما أنا رايح له أهو
قالها ثم غمزها مشاكسًا:
_ بس يعني كنت مستني تقوليلي مستنياك على نار، أو ترجعلي بالسلامة يا جوزي يعني أي حاجة من الكلام اللي الواحد مسمعوش طول حياته دا
حدجته أحلام بعيون واسعة مذهولة مما يُردده، ثم أطلقت ضحكاتها وقالت من بين ضحكها:
_ يووه أنت عايزني أقولك مستنياك على نار؟
_ وماله؟ وحشة؟
تساءل قاسم بنبرة مازحة فهللت أحلام وهي تدفعه خارج الغرفة:
_ يلا يا قاسم ابنك مستنيك على نار يا حبيبي
نظر إليها مستاءً وهو يردد:
_ لا أنا عايزِك أنتِ، هو هعمل بيه إيه؟