رواية عشق الثأر كامله وحصريه بقلم مينة طلال
بغداد/ العراق / ١٩٨٥ الساعة ب١٠ ليلاً..
خلصت شغلي ورحت لفرعهم اباوع لبوبهم واحد واحد ونار احسها تشتغل بكلبي كل مااباوع تكب اكثر
مرت ١٢ سنة واني ماناسي ذاك اليوم الاسود الي كلب حياتي كلها وخلاني بس أفكر بالانتقام
درت ظهري واني اتوعد يجي يوم واني اخذ ثاري منكم واحد واحد واضوكم نفس الوجع والقهر والحسرة الي عيشتونيها اني واختي
أسحاق : رجعت من فرعهم التفت وراية ماكو احد
كملت مشي واني اسمع صوت مشي احسة قريب مني
دنكت أسرعت بخطواتي واحس الخطوات تتسابق حتى توصلني
كطرات المطر بدت تنزل علية ملابسي تبللت
وبدة البرد ياكل جسمي النحيل
واني احاول ارجع للبيت قبل لا تقوة العاصفة اكثر واصفى بشارع
كالو اليوم عاصفة شعدك طلعت يا أسحاق ليش رحت للمنطقة هاي لشوكت تضل تباوع من بعيد شوكت تتحرك شوكت
ضليت احجي بعقلي واحاول اوصل لفرعنا من حسيت الخطوات اختفت نداريت وانصدم وراية …
________
_______
في داخل احد البيوت القديمة
الشر والسلطة هما الذان يحددان مصير الانسان عندهم
في غرفة يجلس ثلاث اخوة على طاولة طعام
لا يجمعهم من الاخوة صلة غير حب المال والشر والطمع
لدرجة لا مانع لديهم بالتضحية بااحد اخوتهم لأجل مصلحة البقية..
غايب : كلتلكم اكتلو هوة وعائلتة اغبياء
هاي ثاني مرة المح ابنة يحوم على بيوتنا طامع بالفلوس مثل ابو
خل نتغدة بي قبل لا يتعشة بينا
جاسم: نسيت اخوك هادي متحلف بيك
اذا صار شي على ولد زيد يخليك انت المسؤول
قادر: نفكر نخلص منة مثل مخلصنا من ابو ونكول حادث
غايب : صبرولي لعد بس احسبها عدل
جاسم : ونتقاسم كلشي بالعادل نفس ذيج المرة
قادر: تضل طماع
جاسم : يلا يالحنين ، هسه عساس انت شلونك
دك على الطاولة بيدة مسكت نقاشهم الجشع وهوة يكول
_ لكيتها…
_______
_ جان عبالي حبنا يكدر يطفي نار الثأر الشاعلة بكلبك
_ عشرين سنة انتضر هل يوم مااكدر اعوف ثأري واختارج..
______
في عالم يسوده الطمع والشر
داخل محافظة تحتضن كل الجناسي والاديان
بمختلف الطوائف والعقائد
ندخل احد احيائها الصغيرة
حيث نطلع على ماضي أليم تركَ…
نيران في صدر ذلك الطفل الصغير
لم تنطفئ رغم مرور السنين
ليأتي الزمن ويجمع له بين اخذ ثأره واخذ حب حياته..
فهل يستطيع الحب اطفاء عشق الثأر؟…
_زماًن فيهِ قد عاشرتُ قوماً
ولأني فيهم أخطأت اختياري..
ومنهم ما حصلت بس الحجي والعض
فاليس الذنبَ ذنبهمُ ولكن
الذنب بطير الأجة صيادة و انكض
فلا النصحُ يفيدُ ولا الكلامُ
رفت بالثوب بي الفار كرض ..
___________
في روايتي نفتح جراح تلك العائلة
التي خسرت الأمان والحب بسبب ظن الاب
ان جميع الناس طيبون مثله…
بغداد ..
في احد احياء بغداد مدينة السلام
في بيت قديم كان يملؤه الحب والدفء
الذي تحول بليلة وضحاها لبيت بارد خالي من المشاعر
مملوئ بالأحزان والألام…
_كعدت الصبح بسرعة لبست دشداشتي الطويلة
اخذت فوكاها الجبة القديمة جاي البس الحجاب
اشوف شك بجتف الجبة فتحت عيني مقهورة شسوي هسه اطلع هيج؟
حاولت اغطي الشك بالشال مافاد ضل مبين لفيتة بسرعة
هوة منظري يوحي اني مجدية واكثر من مرة الناس تحط بيدي فلوس اني وامشي عبالهم اجدي
نوب تنشك الجبة الله على حظج دموع…
نزلت دموعي جاي ابدي نوبة اللوم بأبوية وبحظي صاحت عمة من جوة كالعادة:
كفاح: مانزلتي اميرتنا ان شاء الله تريديني اني اصعدلج اكعدج
كعدي من عساج لاكعدتي ان شاء الله
هزيت ايدي استغفرالله اليكعد على صوتج وحجيج شيصير بيومة
نزلت من الدرج واني فاتحة ايدي وامسح بوري الحديد مال درجنا واذكر من اشترى ابوية شلون فرحنا بي استرجع ايام طفولتي بهذا البيت عاطت بية:
_ تتلولح بت اخلاص نزلي بسرعة لفاهية
سرعت خطواتي رحت للمطبخ اريد اتريك شي سريع حتى اروح للشغل
عاطت ركعت الثلاجة استغفر من الصبح عياط شطلعت هاي
كرهتني بعيشتي كمت اتمنى الموت ومااضل يمها ولاابقى بهل بيت
كفاح: تريد تتريك العوبة امشي امشي لشغلج ثولة يلا
أسحاق : اصبحنا واصبح المُلك لله منو مضوج الملكة كفاح
وخبصتنا بصياحها من صباحيت الله
الناس تكول ياكريم تشغل قران دعاء بس ست كفاح تعيط شنو عبالج بلبل حظرتج
ترة صوتج يسبب ضجيج بالحي
دموع: خوووية..
كفاح : لا لا شو عوفي يحجي ابن زيد
امداك وامدة حجيك صدك الخلف ما مات مثل ابوك جان مسوي روحة مثقف وهوة وبس هسه انت مثلة مصدك روحك
ولك اذا بيك خير وزلمة ومصدك نفسك اطلع اشتغل انت
كاتلنا الفكر وخال اختك تطلع بشوارع..
أسحاق : بكيفي ما يعجبني اشتغل عدج شي يمي؟
كفاح: ممنوع ادور غداء اليوم
ضحك ضحكة طويلة بصوت عالي مسح وجهة وهوة يباوع عليا
وعليها واني كلبي محروك من اشوف دمارات وجهة تطلع من القهر والعصبية :
_من شوكت نفسي طابت لطبخة منج ومديت ايدي لأكلج ست كفاح
الله لايعوزني الج بيوم..
كفاح: اذا مااشكيك لعمامك اصبرلي
_ تندلين الدرب لو اخذج بطريقي
_ بسيطة أسحاق سهلة ٫ اني وياك والزمن طويل
هز ايدة وصعد للسطح يومية عدة عادة يصعد بسطح
يضل ساعة وينزل يطلع من البيت مايرجع لليل
شكد اتوسل بس اسويلة اكل مايرضة
اكولة اني اطبخلك من ايدي مو من احد هم ميقبل
الة احط الصينية كدامة واحلف بروح ابوية يلا يمد ايدة
ياكل كم لكمة ويوخر من الصينية
عمت عيني جسمة صار ضعيف حيل وعظامة كامت تبين.:
جريت حسرة ، عدلت حجابي جاي اطلع جرتني من ايدي قوي تهمس
كفاح : الك××× ادري بي يسمع كلامج ٫ عقلي اخوج احسن مااخلي عمامج يكسرو ويكعدو خل يصير زلمة ويشتغل يصرف علينا لو عاجبتج دياحة الشوارع..
هزيت راسي اي وخرت ايدها مني طلعت من البيت
سديت الباب واني اباوع لبيتنا بقهر..
_ اخخ ياريحة ابوية شكد كارهتك ، امنية عمري مااطبلك بعد
دنكت امشي على كيف كمت اسمع واحد يصوفر وراية كبل دموعي اجمعت بعيني واني احجي بعقلي..
_ ليش يارب احنا هيج يصير ويانة ، ناقصني اني هسة منو هذا يصوفر وراية
_ يحلوة..
دك كلبي بخوف نداريت واشوف أسحاق مبدل وكاشخ لابس نظارات ابوية وساعتة حاط القمصلة على اجتافة مالابسها وشايل كتب لجامعة ،جان يمشي وراية ويصوفر
أسحاق: ثكيلة بنت اخلاص ماتندار ، مو جاي اصوفرلج
_ صدك تحجي أسحاق ، خوفتني ولله ناقصني اني
بجيت وهوة بسرعة مسح وجهي عاقج وجها ويباوعلي
أسحاق : شبيج
_ طكت روحي أسحاق ، ما شفت عمتك ، اني هم بشر ولله
تعبت ولله تعبت ..
_ باعي متفق وياج هذول مو كرايبي ، ثانياً شنو ماتعودتي عليها
صار ١٦ سنة هذا مسلسلنا مجاي يجي الجزء الاخير نوب جاي ينعاد ماكو مشاهد جديدة..
_ لو تعرف شكد متشوقة اعرف شراح يصير بالحلقة الاخيرة
_ ماانصحج
_ ليش
_ لان راح يحتركون كلهم بنار جهنم..
_ شتقصد منو يحترك؟
_ انسي ، وين رايحة
_ يم اديان اكمل دروس المحاضرة الثانية واطلع للمطعم..
_ كلتلج لاتشتغلين واطيج فلوس واطيها سكتيها بيهن
_ فلوسك تفيدك كراوي واقساط وسلفة
اني همزين ابو اديان ياخذنا ويرجعنا
بـﻋـَدين ابقى الليل بشارع ولااضل يم كفاح ساعة
_ ضلي يم اديان وعساس انتي بشغل
ولله كلبي جاي يحترك واني اشوفج ترجعين تعبانة وماتلحكين تدرسين
لا ترسبين وتتشمت بيج هاي الحقيرة..
_ عوفني خوية اشتغل وانسى همي ، بس اكعد ياكلني الهم والتفكير والقهر
_ بشنو تفكرين؟
_ مو كلشي ينحجي ياخوية مو كلشي اكو اشياء اذا تنحجي تنهجم بيوت خليني خالتها بكلبي ومتحملة انت روح لجامعتك
واني راح ادك الباب تطلعلي اديان
وكف من بعيد يباوع علية ابتسمتلة دكيت الباب ، طلعت اديان لابسة تنور سودة وبدي صوف فاتحة شعرها الاشكر، لافة لفاف على ركبتها ابتسمتلي وحضنتني تسلم علية:
اديان : صباح النشاط ست دموع
دموع: صباح النور حبيبتي نروح؟
_ يلا بس اجيب جنطتي بسرعة
طبت تركض وأسحاق هزلي ايدة وراح ، ضليت اراقب مشيتة مدنك للكاع مغطي راسة بكلاو ، بالكوة مبين هوة من ورة الكلاو والنظارات..
طلعت اديان وهية تصيح لامها على طلعتها
_ طلعت امي مو تكولين ما كلتلج انا..
سدت الباب ونزلت يمي لزمت ايدي ومشينا لمحل ابوها
اديان صديقتي من المتوسطة نجحنا سوة مرحلة المتوسطة والأعداية وانتقفنا ندخل جامهك سوة ، اديان مسيحة هية وعائلتها بس مايوم حسستني احنا من غير دين
بالعكس دائما جانت تمدحني بالحجاب ، وتسألني عن القران
وتحب تسمع احاديث الرسول مني
واتشاركني ملابسها الواسعة وتمدح الاسلام ..
وصلنا لمحل عموو لوريس
جان عدة محل بسيط مال لالات وصوبات نفطية
شافنا ابتسم ووكف:
_ بناتي جايات قبل الموعد
دموع: صباح الخير عمو
لوريس: صبح النور بنيتي ، شلونج شلون اخوج شسمة
عذريني بابا راح أسمة من بالي..
ابتسمت احجي بهدوء : أسحاق عمو
_ اي بابا عذريني الذاكرة مو مثل قبل شلونة ، شلون وضعكم ويا عمامكم مرتاحين؟
ابتسمت واني مر على بالي الضيم كلة جاوبتة: نعمة عمو حمدلله عايشين المهم عمو نروح
_ يلا بس اسد المحل روحنا كدامي
ضل يعزل المحل ويطبب الغراض الطالعة اني واديان رحنا
فتحت السيارة مالتة
صعدت يمة واني وراها اجة شغل السيارة واخذنا وصلنا للجامعتنا وراح
تمشينا اني واديان كعدنا بحديقة الجامعة طلعنا الملازم نراجع
واشوف مرة جبيرة كاعدة يم بنتها تراجعلها بملزمتها
ضليت ارقبهن واني تنفتح جروحي..
اني جامعة بغداد تمريض طبعا الفضل يرجع لله ثم اسحاق
الي ماخلاني اعوف درستي لحظة كل ماافكر ابطل لو امل
او افقد الامل خاصتاً بعد وفاة بابا
هوة جان يشجعني وياخذني بيدة لجامعتي ويدرستني ويجيبلي ملازم وهوة ماعدة فلوس يروح يشتغل شغلتين اكثر
حتى يوفرلي كتب وكروة
اني خليت تعبة بعيني وشديت حيلــي اضل للصبح ادرس
شـَڪد عمة حطت نكرها ويانة اني ويا وحاربتني ورادت تخليني ابطل
بس ماكدرت لاسحاق
لان احنا عايشين بيت ابونا
عمامي تقاسمو ورث جدي اكلو ورثها وضلت يمهم من بيت لبيت
ماتزوجت وكل ماتعاركها وحدة من نسوان عمي تحول للثاني
لحد ماتوفة بابا وشمروها علينا
جان ؏ـَمري ٩ سنوات بس شوفتني المر
خلتني انظف واطبخ وادرس كم مرة ايدي تحترك واسحاق يضل يصيح
اسحاق جان يوكف بوجها مرات يتعارك وياها
مرات يشتغل بدالي ويكلي روحــي اقري
اما امي..
شحجي وشكول عنها كل مااذكرها مااصدك بعد اكو ام تحن على أطفالها ابوع للنسوان احسهن كلهن يمثلن جذابات بسبب الي عشتة وياها..
امي ازوجت ابوية وهوة يحبها
جانت حلوة حيل شافها حبها وخطبها
جدي صاحب عقارات ومصنع وسمعتنا بيت حجي صابر سابقتنا
فاامي من خطبها ابن حجي صابر وافقت كبل هيه واهلها علمود فلوسهم
بس نصدمت من شافت ابوية معتمد على روحة ويشتغل حالة حال العامل بمصنع ابو وما ياخذ فقط حسابة اليومي
معتمد على نفسة سكنها ايجار ويصرف من الراتب الي يطي الة جدي
جان جدي دائما يكلة روح للبيت مالتنا عيش بيت الفلان
اسحب من الفلوس انت ابني انت جبيري
جان يكلة اني رجال انت سويت هاي الاملاك بيدك واني مثلك اريد اسوي روحــي مااريد اعيش على ظهرك اني مفروض بعمرك هسه ترتاح واني اطيك مو انت تشيل همي وهم عائلتي
اول سنة زواج خلفت امي اسحاق
وراها بسنتين جابتني للدنيا سمتني دموع لان تكول من حبلت بيج
لحد مجبتج واني ابجي من فكر ابوج
جانت تخلف عبالها ابوية من تكبر عائلتة يستسلم وياخذ من فلوس ابو
بس جان ابوية يشتغل بالمكاتب الدلالية وبليل يروح للمصنع
امي تخبلت هنا وكامت تكبر مشاكلها ويا ابوي
وجدي لان جان يحبنا احنا اول احفادة ويحب ابوية
من يطلع للشغل يجي للبيت يجي كل انوع المسواك والفواكه والالعاب واللحوم وملابس مايخلي شي مايجيبه ويحط بيدي اني واسحاق ٥٠ دينار كل واحد ويروح لبيتة جان نفس فرعنا القديم
امي جانت حيل تتملق لجدي وتسوي روحها الجنة الحبابة التحبة
ومن يجي تسوي روحها الام الحنونة الي تخاف علينا من الهوة
وبس يطلع جدو تاخذ الفلوس من ايدنا
تصيح بينا طبو للغرفة وتحبسنا
تحبسنا بالغرفة النهار كله تنطينا لعبة لو لعبتين من الي يجيبهن جدو وباقي المسواك واللعاب تضمهن وتخابر بيبي امها تجي تاخذهن لجهال اخوها والمسواك هم
جنت استغرب ليش ماتبقي كل شي النا وتخلينا عايشين على الي يجيبا ابوية بس
لعد ليش تاخذ من جدو؟ وهية تدري اصلان ابوية ميقبل ياخذ
امي من عائلة جانت جداً جداً فقيرة من خطبها ابوية
جانت عبالها راح تعيش بقصر جدي وتلبس وتاكل وتشرب
مجانت تعرف ابوي ميريد يعيش براس ابو
يريد هوة يبني روحة..
كثرت مشاكلها ويا ابوية هواي لان اكتشفها تاخذ حبوب منع حمل
من عاتبها تكلة مااريد اخلفهم للفكر
جنا نكعد الصبح ابوية يسوي ريوك الة يكولنا ويا ويطلع للشغل
هية تكعد تحبسنا بغرفتهم تنطينا لعبتين وتضل برة ماتخلينا نروح بس للحمام
من تشوف الساعة راح يجي ابوية طلعنا تسبحنا وتلبسنا ملابس حلوة وتسوي اكل وتخلينا بصالة تضل تراقب الباب بس تسمع صوت برة تسوي روحها كاعدة ويانة وتلعبنا
جنا اني واسحاق صغار وحيل نفرح من تكعد تلعب ويانة لان هية متلعب نضل نشبكها ونبوس يطب ابوية يشوفنا بهذا الوضع
توكف هية تحضنة وتسلم علية ويحضنا احنا هم تحط الاكل وتوكلنا كدامة عباله جاي نتعشا واحنا على الريوك مالتة..
جانت امي مملثة بارعة لان سنين واني واسحاق نكول هل سنة فعلاً تغيرت حنت علينا حنت على ابوية وبعدين نسمعها تتفق ويا امها
امي هية امي الي حملت بية وطلكت ورضعت
بس لو عدي مرت اب جان حنت علية اكثر منها
سنين واحنا محرومين من طلعة الشارع بس سجل اسحاق مدرسة طار من الفرح من شاف شارع وجهال وكام يشوف الدنيا لان جنا الحوش ماشايفي من وراها
ضليت اني ورا محبوسة بالبيت كامت امي تعلمني اساعدها بشغل انظف اني وياها تجي الظهر بيبي ومرت خالي
تحبسني بالغرفة يضلن مدري يسون دخان ويحجن حجي غريب ويكولن اسماء بيت جدي وعمامي ويروحن
جنت اكلب بكتب اسحاق من يروح واضل ضايجة ماعدي شي اسوي هوة جان يحجي وياي يحجيلي قصص من كام يداوم يجي تعبان ينام من يجي ابوية من شغل يكعدة ياكب ويدرس وينام
بيوم جنت اكنس حديقتنا الصغيرة اجمع الاوراق الطايحة واكنسها نوب ارشها اندكت الباب صحت منو اجاني صوت بيبي جاية وحدها فتحت الباب دفعتني وطبت جوة بسرعة وجها احمر
مااستغربت فوتتها هية ولامرة باستني اني واسحاق ولاحضنتنا ولا مرة حسيتها بيبي صح
عكس بيبي ام ابوية جانت حيل حنينة علينا
دائما ادز على امي ماتروحلها ادزنا بس اني واسحاق
تلعبنا وياها وتوكلنا تسبحنا مرات انام بحضنها لان مشابعين حب ابوسة بشغل خطية يجي بليل تعبان يكعد ويانة شوية ويغفة هوة وكاعد
امي حايرة باهلها مدري شيخططون من سنين
طبت بيبي تصيح اخلاص اخلاص خ*** وينجج
اخلاص: ها يوم شجابج مكتيلي شلونج
حوة: شلون اصير ولدي اخري** مثلكم شكلتلج ولج انة ها؟
جرت اني من راسها وامي تبجي وتكللها مقبل ولله مقبل
اني ركضت ادفع بيبي من امي بكل براءة عود ادفع عن امي جان بيبي تركعني بعوجيتها على ظهري صرخت من الوجع
عبالي امي راح ادافع علية اندارت هية وامها يضربن بية هية تكفخني راشديات وتفشر ماخلت حجاية مكالتها
وبيبي تضربني بالعوجية صارن ضرباتهن مبينات بجسمي كمت اصيح من الوجع ركعتني براسها عطت
خليت ايدي بمكان الضربة حسيت مي باوع لايدي صارت حمرة من الدم من الخوف اغمى علينا
فتحت ؏ـيونَي جدي وبيبي وابوية وامي فوك راسي كعدت شفت روحــي مكان مشايفتة عمامي جانو شباب
واكفين برة اسحاق بملابس المدرسة يبجي من فتحت عيوني ركض جدي وابوية واسحاق يلزمون بية ويساألوني شلونج
باوعت لامي تخزرني ومن تباوع بيبي علية وتندار علية تغطي روحها بحجابها وتهز جسمها تبجي
كال جدي يمسح بوجها
صابر: اريد اعرف هذا ياابن حرام طب لبيتكم وكاتل طفلة
والله الزمة لو يطير واكسر ضلوعة
زيد : هسه انتي اخلاص طلعتي وديها لامي شلون خالتها وحدها لو خاطفها مسوي شي شسوي بيج ولله جان موتج بيدي
ضلو يتصايحون تقرب اسحاق حضني بيدة الصغيرة وشاورني
اسحاق: امي ضربتج مو دموع مو حرامي طاب كولي
بجيت هزيت راسي حضني وباوع لامي بخزرة صاح بصوتة الطفولي مسكت عركتهم
_ انتي شلون تمدين ايدج على اختي
اكرهج انتي مو امنا مانحبج نكرهج ان شاءالله تموتين
صاح بي جدي: حدك
شجاك حبيبي واني اكول حفيدي اسحاق العاقل الجبير
شلون تحاجي امك هيج مو هية ضربتها هذا حرامي طب من شاف اختك شافتة ركعها بالحايط وشارد
اسحاق: لا جدو امي جذابة ماتحبنا بس كدامكم هية تحبسنا وتجوعنا وتضربنا هية ضاربة دموع
انصدمو كلهم وبيبي لزمت امي من ايدها تقرب ابوي وجدي يمي دنك ابوية لمستواي لازم ايدي
زيد :دموع بنيتي احجي الصدك احنا نحبج ومانسويلج شي
صدك امج هية الضربتج؟
صابر: كولي جدي لاتخافين
رفعت راسي اباوع لامي تهز راسها لا وتخزرني
بيبي صاحت احجي حبوبة احنا يمج
دموع : بيبي صح ماما وبيبي حوة طكني
صابر: سواد وجهج يا اخلاص طاكين بتنا
زيد: اطلكج ولله ما تضليلي مرة
اخلاص: ما تحجي الصدك عمي هاي من العلاج تهلووس
جيبولي القران احلف علية ماطاكتها ولله انة ولا شايفة امي هية
حجينا اني وأسحاق الحقيقة ماجنا نعرف
انو ثمن الي يحجي الحقيقة كدام شخص ظالمم
ومايخاف الله ممكن تكلفك حياتك
فززتني من شردتي اديان وهيه تكومني نطب للمحاضر الاولى
جاي نمشي بحديقة الجامعة اني وياها صاح ولد يابنية
ندارينا واشوف واحد شبهت علية بس ماعرفتة منو كال:
يٰس: انت مو بنت عمو زيد؟…
_____
فصول الرواية: 1 2