رواية عشق الثأر الفصل السابع 7 بقلم مينة طلال – للقراءة المباشرة والتحميل pdf

مُروج..

عائشة: مُروج منو جذب عليج وكالج عمج هوة القتل اهلج؟ احجي ما احجي لاحد..

مُروج: عائشة اني دورت وسألت هواي ناس وهواي حجولي شلون ضربهم طلق وفات للسجن ، حتى انتي جنتي موجودة ، وسجنوج هم..”

عائشة: اذا احجيلج القصة كلها تصدكيني؟

_ وليش مااصدكج!

_ اكول خاف عبالج اجذب عليج

_ احجي…

بديت احجيلها من زواج قاسم لحد ماحبلت ورجع من السفر وشلون جان مخطط يفاجأنا ويا اهلها بعيد ميلادها وشلون طب ابوها وشاف منظرها لحد مجابت صاحبها وكتلهم..

_ عزة عائشة اكول عمو ليش ممزوج! يعني الي قتلهم همة مرتة وصاحبها مو اهلي؟ زين وبعدين شصار؟

_ بضبط مدري شلون ناس كالو اهلج ، المهم وراها اخذونا للمركز احنا وجاي يحقق ويانة ، اجاهم خبر عائلة نكلبت بيهم السيارة وماتو بس الطفلة عايشة وبالعناية..

مسحت دموعي واني اكللها بصوت يرجف: وهاي الطفلة جانت اني؟

_ للاسف..

واكو شهود هواي اكدر اخذج لبيوتهم اخذج للمركز مال شرطة للمستشفى، قاسم معلية اصلان من ماتو جان بسجن حتى مكدر يشوفهم ولا يودعهم وحتى فاتحتهم ما حضر ضلت حسرة بكلبة لليوم .. اعتنى بيج وحبج واعتبرج بنتة وحبيبته واخو شـَڪو حب عندة انطاه الج ..

صرخت يمة نهاريت ابجي عبالك هستوهم ميتين وهية حارت شلون تسكتني ، لزمت كلبي اشهك احس راح يوكف كلبي ، راحت تركض تخابر واني تمددت بالكاع اتخيل شكلهم شلون نكلبو بسببي ، ماتو جانو خايفين اموت همة ماتو، كل هل سنين عبالي بسبب عمي ماتو طلعت اني السبب..

نوب ارجع اذكر شـَڪد ظلمت عمي وشكد تعذب واني جنت ازيد عذابة فوك مااحتواني هل سنين كلها وصارلي اهل وسند..

ضليت لامة روحــي بالكاع وابجي طب عمو ركض..

قاسم:مُروج حبيبتي شبيج بابا ، حبيبي مريضة يوجعج شي ليش هل بجي يروحي شو كومي، منو وياج

رفعني من الكاع واني شمرت روحــي بحضنة اشهك : اسفة عمو اسفة شكيت بيك وضنيت ضنون سوء وانت جان بس الزين يجيني منك عبالك انت الموتت اهلي اسفة ولله اسفة هسه يلا عرفت الصدك

قاسم: عائشة انتي حجيتيلها

_ استاذ جان لازم احجي ..لان..

_ تفضلي عائشة اريد احجي ويا بنتي وحدنا..

بستها من راسها وخرتها من حضني كمت اطلع وسديت الباب

نزلت واني اذكر ذاك اليوم دقيقة دقيقة..

سحبوني من غرفة المحقق للسجن الانفرادي نهاريت واني اتخيل مروج ماتت هيه واهلها وارجع ابجي على سيد قاسم الراح مستقبلة وشبابة

حصرت روحي بزاوية الزنزانة الحديدية ضمت راسي بين رجلية حيلــي باد اصعب ليلة مرت علية بحياتي مااعرف شوكت نمت بس فزيت بضربة الحديد والشرطي جاي يفتح القفل

الشرطي: كومي راح يطلعوج

_ عفية وياي ولد هم يطلع؟

_ لا يضل بسجن لحد ما يصعد محكمة..

طلعت اجر بروحي جر من التعب النفسي والجسدي رحت وقعوني على اوراق طلبت اشوف قاسم ماقبلو طلعت من المركز جريت نفس حسيت عمري كله بعد مااطلع

اول مرة بحياتي اجرب شعور انو مكان ممكن يكون قبر

اصعب شي مر علية بحيث كرهت البوب والشبابيك وكلشي بل بناء

شنو شي احنا نصنعة يحبسنا ؟..

صفنت بشارع وين اروح مااعرف ارجع لبيت قاسم؟ ارجع لهلي اروح اشوف اهل مروج شسوي افتريت ورجعت للشرطة

ماقبلو يفوتوني بتواسيل طبيت للضابط بس شافني تفاجأ

_ شنو عجبتج الاقامة يمنا؟

_ سيدي ابوس ايدك اريد احجي ويا قاسم بداعة اهلك حتى لو بوجودك فدوة استاذ..

_ خمس دقايق بس

_ هاهيه مشكور رحمة الله والديك

صاح لشرطي اجة اخذني للصفحة الثانية هم سجن منفرد شفت قاسم كاعد بزاوية ركضت الة

_ استاذ استاذ قاسم

كام بتعب اجة يمي جلب بالقطبان: ها عائشة مو طلعوج ليش بعدج هنا؟؟

_ ماعرف شسوي استاذ ارجع لهلي ، ارجع للبيت اروح لهلك شسوي؟

_ البيت بأمانتج ابقي بي انتي ومروج ماعدها احد بعد غيرنا، ضلي يمها وكل مصرفكم يجيكم ، هسه روحي للبيت طبي لغرفتي تلكين قاصة رمزها ١٩٧٠ طلعي فلوس منها وروحي للمستشفى شوفي وضع مروج ودفعي كلشي تحتاجة وخليها بأمانتج بين مااصعد محكمة اكيد راح اخذ سنوات بسجن اريدج وياي عائشة ماضلي بشر اثق بيهم

_ يمك استاذ تدلل ولله ماانسى افضالك علية

_ رحم الله والديج روحــي هسه

_ ماشي استاذ بس ارجعلك

____الان___

قاسم: عائشة سوي غداء

_ حاضر استاذ

رحت للمطبخ اباوع للقائمة المسويتها اليوم دجاج بالفرن طلعت الدجاج بديت اتبلة واجت وراية خولة تساعدني عاملة تنظف كل جمعة تنظيف عميق وتروح كالت:

_ عائشة من شوكت هنا تشتغلين؟

_ مو هواي من ٢٠ سنة

_ يابة ، خلص عمرج مزوجة انتي

دنكت اطلع البهارت واحجي: لا اني مو مثل النسوان الي عاشن واهلهن يتكفلون بيهن ويدرسن ويحبن ويزوجن

اني وعيت للدنيا امي ميتة وابوية معوق يشتغل بسوك

بس كبرت بديت اشتغل ماخليت شغلة مااشتغلتها لحد ما عرفت استاذ قاسم عاشرت شكو نذل ودوني حمدلله اخر شي الله عوضني باستاذ قاسم ابن حلال لمني اني وابوية وتكفل بعلاجة واني معززة هنا ولااحس روحــي اشتغل عدهم عبالك اهل واساعدهم

مشة بية الزمن ومالحكت ازوج مات ابوية قبل ٣ سنوات وصفيت وحدي ستقريت بيت الاستاذ

خولة: زين وماحط عينة عليج بنية ممزوجة وحلوة تفرفر كدامة

نداريت اريد ارزلها واشوفة واكف بالباب يسمع : استاذ…

__________

دُموع:

_ صافنة اذكر اخر لحظة لابوية هوة ويوصينا ندهتني عمة

كفاح: نظفي الكاع دموع ؏َـيب ناس كامت تجي

هزيت راسي رحت برة جبت المكناسة وسطلة الم الكزاز النكسر والطلقات ، بديت انظف الكاع أسحاق طبب بيت اديان للاستقبال صاحني ،اخذت مني المكناسة عمة وكامت تكمل مكاني واني رحت اسلم عليهم..

دكيت الباب وفتت جان عمو لوريس وام اديان ماري وهيه حضنتني قوية خايف علية: شصار دموع خما بيكم شي بس سمعنا من جيران اجينا بسرعة

دموع: حمدلله عدت حرامية من سطح ٫ من شافو أسحاق رمو وشردو

لوريس: ياستار وليش مخابر الشرطة اسحاق ٫ بنيتي ليش خاطرتو بروحكم غير تبلغون عليهم

_ عمي ما لحك حطو السلاح براسة شلون يتصل..

_ حمدلله دفع الله البلاء

ماري: الله يحفظكم ويرعاكم، دفع الله البلاء يابنتي..

_ شكرا خالة ..

طب اسحاق يسلم واشوف اديان تباوع علية هزيت ايدي لا ربحنا عمو كلة: ياابني لازم تأمن بيتك وسطحك انت عندك نساء وانت ممتواجد دائما..

أسحاق: عمي همة عصابة شسويلهم

باوعلة عمو مستغرب كالة عصابة؟ حجيت بسرعة: أسحاق غير حرامي من سطح حطو المسدسات براسك حجيت العمو مو غريب هوة

اشرتلة بعيوني وهوة كمل: اي ولله عمي حرامية ميخافون من الله

لوريس: سمعت عمامك هنا جانو واتصاربو

_ اي ولله عمي ضلو الحرامي يضربون بجو ووكعت بيهم همزين ربك جروح ماكو شي خطير..

– الله يسترنا

ﻻ.

اديان: حمدلله على سلامتكم اسحاق

_ اخيتي رحم الله والديج

عفتهم ورحت للمطبخ اسوي ضيافة واشوف عمة مسوية جاي صفنت مستغربة كتلها: عمة جاي تسوين جاي الج؟

_ لا عمة لخطاركم شسوي بجاي اني

صفنت عليها مستغربة افعالها نضفت وسوت ضيافة صبت واطتني الصينية

_ روحــي عيني

نوب عيني؟ لا اكيد الصار اثر على مخها ضحكت على روحــي وانتي اتخيل عمة تخبلت طبيت مبتسمة أسحاق شافني اشر شـَڪو والناس استغربو مني بس اديان حجت ماتحملت : زين منج وتبتسمين حبيبي شـَڪد سباعية اني ذيج المرة فارة دخلت غرفتي ضليت شهر انام بنص اهلي.. شـَڪد نجرة

أسحاق: الدنيا تكوي اكبر واحد خوية

هيه ابتسمت من خاطبها وراحت ابتسامتها من كاللها خوية دك مبايلة جاوب: ها خالد

اي اي اعرفك

حرامية غير

ضحك ضحكة طويلة وترخص وصعد لغرفتة ضلو بيت اديان مستغربين شبينا شربو جايهم وراحو لميت الغراض ورحت لغرفة عمة تصلي

_ سموحة تاكلين

_ شني سموحة هاي؟

_ عربون الصداقة تاكلين؟

_ جنت ميتة جوع بس بسبب الي صار مااشتهي بعد

_ وشصار يمعود شلون دجاج جابلج ابو يعكرب تاكلين ايدج ورا

هزت ايدها تضحك عزلت غراضي فوك صحت اسحاق ونزلت حميت الاكل خليته بصينية وترست الصوبة شغلتها وخليتها بصالة واجوي

كعدنا ناكل بهدوء ولا كأنو اكو ثنين تصاوبو وبيتنا جان حرب العالمية…

خلصنا سويت جاي وغسلت المواعين اجت عمة اخذت صينة الجاي والقوري وراحت تصب

توترت من هل وضع وين سبها وصياحها شنو السالفة ؟

معقولة صرت دوشك رزايل ليش هيج كمت استغرب معاملة الاحترام!

رحت كعدت يمهم صابة جاي لأسحاق وجاي يشربة! أسحاق الي من سنين مايرضى ياخذ منها مي يشرب الجاي! سكتت شوية البيت هدوء ودافي بس صوت خوطهم بالستكاين ماتحملت كلت: عمة بيج شي ، أسحاق صاير وياكم شي

أسحاق: شبيج دُموع الطلق اثر على مخج شبينا؟

كفاح : شـَڪو عمة ليش شصاير؟

_ لا تريدون تخبلوني عمة وين رزايلج النا وين الغلط والدعاوي وين أسحاق الي مياكل ويانة؟

رجعوني للمود القديم هذا ممتعودتلة

كفاح : عمة الانسان يغلط ، جنت حاسبة حساب شكل وصار شكل والله بين الوجوه…

أسحاق: من البداية جنت اكلج الحك وانتي جنتي مصرة تغمضين عينج عنة. سمعتي اخوج شكال ؟ كال غايب خطط معلية ، ما سألتي روحج لشنو خططو وشنو سوو؟

كفاح : عمة عوفهم خل يولون ماتعرفهم انت ترة لا عبالك يسكتون بس الله ليستر ، مفكرة اخذكم ونطلع من العراق مدام الوضع خرب..

أسحاق : ما انام على ثار جدي وابوي..

_ عمة عمة افهمني ، ميخالف ممكن يبكون ياخذون حك بس مو مال يقتلون اهلهم..

_ هه ، عمة اذا انتي نسيتي الماضي اني يومية ينعاد فيديو مثل الشريط بعقلي ما ناسي ولا لحظة

كفاح : وشتريد تسوي

_ اصفيهم وداعتج..

_ ويامن تصفيهم انت وشلة العفطية الجبتهم

_ لا عمة هذول جماعة الساحق

_ منو هذا الساحق؟

_ واحد خوش ولد

_ عمة مو تكول مكالت حتى اطلع من خطيتك لان من اليوم لو دنيا تنكلب ماادخل راح اختلي بربي لااشوف ناس ولااريد ناس تشوفني بس انصحك … قبل سنين جدك كال هل جملة لعمامك وتذكر شصار ويا ؟ بعد بكيفك..

عافتنا وراحت لغرفتها سدت الباب أسحاق حك شعرة بعشوائية عاصر راسة واني اذكر هذاك اليوم..

قبل ١٢ سنة …

جنا راجعين من المدرسة اني وأسحاق وصلنا فرعنا ونشوف هوسة كدام بيت جدي

وجيرانة لازم جرباية تتحرك، جاي يصعدها بسيارة بيها صوت وجدي نايم وغطة علية كلة دم وسيارة ثانية بيها رجال ابوية مجان نص هل هوسة ..

وبيبي تبجي بصوت عالي ، عمة كفاح تصيح وعمامي يركضون للسيارات..

لزم ايدي أسحاق وركضنا يمهم ، شافتنا بيبي جرتنا بحضنها..

شكران: ضلو يمي لا يضيعوكم اخوة يوسف ابقو يمي…

بس طبينا بطرمة ابوية خركان بدمة صوت صريخ النسوان والاطفال بالمنطقة، و رمي الطلق، الدم تارس الطرمة ، ابوية واكع بطرمة اخر نفس ، اني فوك راسة واسحاق على صدرة، اسمع اخر كلمات ابوية بهاي الدنيا: بنيتي دموع عينج على اخوج، واحد يسند الثاني صيرو درع وغطة لنفسكم…عذريني مكدرت احميكم..

بجيت بخوف من الدم التارس المكان واجو شالو من يمنا وأسحاق يركض وراهم دفعو للبيت لزمتنا بيبي و طببتنا لغرفتها..

جان هذا اليوم مثل الجحيم علينا من صبح ما ماكلين ومتنا خوف من منظر ابوية وجدي والي زاد حالتنا سوء مرض بيبي الي خلاها ساكنا الفراش

جدي اتوفة بهذا اليوم والفاتحة ضلت سبع ايام الدنيا كلها اجتنا كد ماطبولنا ناس اسوء ايام عشناهن

نحبس روحنا بغرفتة اني واسحاق ونبجي علية الكل هملنا ومحد يذكرنا من تلمحنا بيبي هالكين جوع ادز وحدة من نسوان عمي على اكل يصبن ويخلنا كدامنا ويروحن

أسحاق من هل فترة تكفلني جان يوكلني ويغسلني ونسبح سوة وياخذي للمدرسة ويقريني صارلي ام واب

مر اسبوعين خلصت فاتحة جدي بدت بيبي تحجي ويانة شوية وكالو ابوكم بالعناية فرحانة من بيبي كالت اكو احتمال يعيش ..

بس الي صدمنا وخلة أسحاق يتحول لوحش كاسر بيوم وليلة ابوية يتسمم دمة ويموت ويرجع عمي غايب مطلك امي وجان مزوجها بفترة وفاتهم..

—- الان

دمووووع…

ركضت فوك يمة

_ ها حبيبي

أسحاق: ولقران ولفرقان غرفتي اذا عبرتي بابها ما تلومين الة روحج خاف بالبداية معرفتي جنت متدرين بعد ما الج عذر

هل قذارة لادخلين روحج بيها اني جاي احاول اطلع روحــي كوة تجين انتي ادخلين هل طريق..

_ توبة ولعباس مااعيدها..

_ عفية بنيتي ، يلا اني طالع..

_ وين؟

_ للشغل..

عافني ونزل كالعادة كله اسود لابس وملثم..

طبيت للغرفة شمرت روحــي بتعب على جرباية جان يوم متعب ضليت اتكلب وكمت رحت للحمام توضيت واجيت اصلي خلصت وضليت كاعدة على المصلاية افكر بكلشي صار اليوم…

_____

أسحاق…

_ الو ولكم ها وثول المن صوبتهم

سليم : لخاطرك ما كتلتهم خلاص وحق الله هل هتلية هذول

عمران: تدلل أسحاق الغالي

سليم: اهو عمران وعرف سالفة..

عمران : تضم علينا اسمك شريك؟

حامد: اكيد عدة اسبابة

عمران : اني اكول انت تسكت

حامد : ساكت ومتحملك لخاطر أسحاق وعلي

عمران : لا تضلون تحلفون

سليم : يزعجك ذكر علي استاذ عمران

عمران : مو هيج بس..

أسحاق : جاي احجي اني يعني خاف نسيتوني حبيت اذكركم

سليم : غير هذول جماعتك احجي كول شبيك

_ خابرني قاسم نروح نستلم سلاح من الميناء

سليم : شيوصلنا لصبح ما نوصل

_ ماادري سليم كال باجر لازم نسلم

– اهو شوكت نخلص من هل شغل الخايس ومن قاسم ماادري..

عمران : شوكت نتحضر لعد؟

أسحاق: جايكم نلتقي بالمخزن ومنك نطلع نستلم ونوديهم

سليم: مخاطرة جبيرة هاي اسحاق احتمال تسعين بالمية يلزمونة الشرطة

أسحاق : لا حياة للجبناء سليم!

عمران : هسه طلعتو ثنينكم ما مطينة اسمائكم الحقيقية

سليم : هاي الهامتك اعرن مو اكلك يلزموك الشرطة

حامد: هية حياة وحدة موت وانت شجاع احسن ما تموت وانت جبان

سليم : خوش حجي روحو سلمو روحكم اني اريد اتونس بفلوسي صار سنتين الم بيهن

أسحاق : جايك سليم

سديتة واني اضحك عليهم شغلت السيارة واتجهت لمخزن واني اذكر الماضي…

١٩٩٧ بغداد المستشفى..

غايب : اطو فلوس لممرض قديم خل يسممون المغذي ويصير بدمة وهاي هيه

قادر : غايب خاف نلكف شلك بهل سالفة هسه احتمال يموت وحدة ليش تورطنا..

جاسم : بس اذكرك قادر اذا كعد زيد يصفينا كلنا خاصتا يدري احنا الي دزينا الناس تهجم على البيت بالرصاص..

جنت وياهم جاي ضليت مجلب بيهم حتى اروح واخذوني وياهم عافوني كدام غرفتة وراحو بكل حقارة يفكرون بطريقة موتة جنت اسمعهم بس مااعرف شسوي والمن احجي ومنو يصدكني ..

غايب : طولتوها اذا اطر الامر افوت اخنكة ونخلص منة…

__________

يُتبع.