رواية عائلة آخر جنان الفصل الثالث 3 بقلم مروة طارق
ناهد : اهي ارادة ربنا يادادة هو اللى بيرزق وبعدين انا بحمد ربنا انهم كلهم سلام وكاملين الخلقة
فهيمة : الحمدلله يا بنتى بس انا كده مش هقدر اقعد معاكي مش هقدر عليهم يا بنتى
ناهد : ايييييييييييييييييه ؟ لييييييييييييه ؟
فهيمة : يا بنتى انا كبرت وماعدش فيا صحة هقدر عليهم ازاي دول
ناهد : متقلقيش انا معاكي انا وخالد ارجوكي يا دادة اقعدي معايا انا هبقى مشغولة طول الوقت
فهيمة : يعني يا بنتى انا مكنتش قادرة عليكي وكنتي شقية طول عمرك ومغلباني هقدر على 8 ولوحدي
ناهد : 9 يادادة 9 .
فهيمة : 9 هقدر عليهم واكيد واحد ولا اتنين فيهم طالعين شبهك في شقاوتك
ناهد بهمس : واحد ولا اتنين دول ال9 سرايا مجانين لوحدهم
فهيمة : بتقولي ايه يا بنتى
ناهد : مش بقول حاجة المهم والنبي ماتسيبنيش يا دادة انا دورت عليكي كتير
فهيمة : امري لله هقعد واعمل اللى اقدر عليه
ناهد تبوس فهيمة : ربنا يخليكي ليا يا دادة وميحرمنيش منك ابدا
يفتح احمد الباب في نفس الوقت …..
احمد : ماما محمد مش راضي يديني الاوضة اللى في وش السلم وهي دي الاوضة اللى عجبتني بقى
ناهد : هتفرق يعني يا احمد
احمد : ايوة يا ماما هتفرق
ناهد : خلاص بقى يا احمد مش هتفرق خود اي اوضة تانية
احمد وهو بيقفل الباب : يوووه بقى
لسة هتتكلم ناهد مع فهيمة … تلاقي الباب بيتفتح وواقف سهر وسمر
سهر : انا عايزة لاب توب
ناهد : حاضر
سمر : وانا عايزة موبايل جديد
ناهد : اوك
سهر : وانا كمان
ناهد بنفاد صبر : طيب
سمر : ماما متهيألى كلنا محتاجين نشترك في نادي
ناهد : حاضر حاضر خلاص بقى
سمر وسهر يبصوا لبعض ويقفلوا الباب….
ناهد بتفتح بقها ولسة بتقول حاجة ….. تلاقي الباب بيتفتح ووقف مروة ومنار ….
ناهد بصوت عالى : هعملكوا كل اللى انتوا عايزينه بس حلوا عن نفوخي شوية
مروة : ايه يا ماما احنا لسة اتكلمنا…. احنا منعرفش انك هنا اصلا …. احنا كنا بنشوف الاوضة دي فاضية ولا لأ عشان ناخدها
وحيث انها مش فاضية فيلا بينا يا منار نشوفلنا اوضة تانية بس يارب نلحلقلنا حاجة
ويخرجوا البنتين …..
فهيمة فطسانة على نفسها من الضحك ….
ناهد : انتى بتضحكي .
فهيمة تعمل نفسها كشرت لحد ما تبعد ناهد وشها وتضحك فهيمة تاني
********************************************************
الاولاد كلهم مجتمعين في اوضة وساكتين وبيبصوا لبعض …….
محمود : وبعدين هنفضل ساكتين كتير
مروة : عايزنا نعمل ايه يعني
سهر : صحيح احنا مش عايزين نقعد في مصر بس ……
سمر تكمل : يمكن نقدر نقنعهم يرجعوا معانا
محمد : نقنع مين ؟ دول خلاص عملوا بيت وشركات وهيستقروا هنا
سارة : صح هما اخدوا اللى هما عايزينه من امريكا ومش هيرجعولها تاني
احمد : ازاي يعني ؟ دل فلوسهم وشركاتهم كلها كانت هنا
سهر : ما هو يابني هما ماكنوش عايزين حاجة منها غير دراستهم ولما خلصوها رجعوا
سمر : بس مفكروش بقى فينا وان احنا كمان عايزين نكمل هناك دراسة وشغل
محمود : ايوة فعلا حلم شركتي انا ومحمد احنا كنا خلاص هنحققوا هناك
سهر : وانا كان معروض عليا شغل في احسن بيت ازياء
مروة : وفرقتنا اللى احنا سبناها هناك وحلمنا انها تكبر وحتى مهند راجع بعد اسبوعين
سارة : وفرصة الدراسة هناك احسن بكتيييييييييير من هنا
سمر : احنا لازم نشوف حل بسرعة اللى بيحصل ده مينفعش
ناهد بتنده من تحت : يا ولاااااااااااااااااااااااااااد يلا العشا جاهز
محمود : يلا بينا ولينا قاعدة تانية بس يجي بس مهند ونحاول نفكر تاني في الموضوع ده
ينزلوا كلهم ورا بعض ……
*****************************************************
ينزلوا كلهم ويدخلوا اوضة السفرة يلاقوا الاكل جاهز يلفوا حوالين الترابيزة ويعملوا دوشة كبيرة على ما يختاروا الكراسي وطبعا كل واحد قاعد جنب توأمه……
خالد : خلاص قعدتوا ربنا يشيفكوا من جنانكم ده لازم الدوشة يعني
مروة : اومال يعني نحس ان احنا قاعدين في بيت ازاي لازم يبقى مكركب ودوشة وازعاج على طول
ناهد : ده مفهومكم عن البيت ؟
مروة : لا ده مفهومكم انتوا والا مكنتوش جبتونا 9
ناهد : بصي يا امورة يا ام لسان طويل انتى انا جبتكوا 9 في 4 مرات يعني لو ربنا كان كاتب كان زماني عندي 4 عيال مش 9 وكلى بقى بدل ما اجي ازغطك بنفسي قال مفهومكم قال .
مروة تبص لاخواتها ويضحكوا بصوت واطي ويبتدوا كلهم في الاكل
خالد : ها يا ولاد ناوين على ايه ؟
محمد بسخرية : ناوين نقعد في مصر
خالد : والله ؟ تصدق مكنتش اعرف
محمود : اه والله يا بابا انت مقلتلوش يا محمد ولا ايه ؟
خالد : ولا انت وهو متستلمونيش عالمسا مش ناقصكوا
سمر : عايز تعرف ايه يا بابا ؟
خالد : ناوين تعملوا ايه ؟ وخصوصا انتى وسهر ومحمد ومحمود انتوا مخلصين انما بقية اخواتكوا هيكملوا في مدارسهم عادي
سهر بضيق : بابا على فكرة ده اول يوم لينا في مصر احنا كل واحد فينا كان ليه احلامه وكان هيحققها هناك احنا منعرفش مصر دي شكلها ايه ولا النظام فيها ماشي ازاي ؟
محمد: صح يا بابا احنا نعرف مصر من اللى بنسمعه فأرجوك سيبنا شوية لحد ما نعرف ايه المجالات اللى هنا والدنيا هنا ماشية ازاي ؟ نتأقلم شوية
محمود : ده لو عرفنا نتأقلم اصلا
ناهد : بلاش نقاش دلوقتي يا خالد
خالد : ماشي بس هقول للولاد على خطة دراستهم
ناهد : اوك
خالد : مروة ومنار حضروا نفسكم عشان هتبتدوا دروس من اول الاسبوع اللى جاي واحمد وسارة نفس الكلام
مروة : دروس ايه ؟
خالد : دروس الثانوية العامة انتوا هتبتدوا من 3 ثانوي واحمد وسارة دروس 2 اعدادي
مروة : طيب تمام وياتري هتقرروا امتى تفهمونا نظام التعليم الجديد اللى احنا داخلين عليه ده
ناهد : انا هبقى اقعد معاكم افهمكم
خالد : ومعاذ اتفق مع سنتر كويس فيه احسن مدرسين الثانوية العامة في اسكندرية وكمان صاحب السنتر يبقى صاحبي من ايام زمان وهيجي بنفسه يوديكم اول يوم ولازم تستعدوا مهند صحيح مش هيلحق اول اسبوع بس مش هيفوتوا حاجات كتير .
يسكت خالد ويسكتوا كلهم ويقعدوا ياكلوا وكل واحد فيهم في دماغه الف فكرة وفكرة ومضايق من مليون حاجة بس الكل ساكت
**************************************************
بليل بعد مل كل واحد استقر في اوضة ماعدا مروة ومنار نقلوا سرير كمان لأوضة وخدوها هما الاتنين مع بعض ……
كل واحد بيفكر في احلامه اللى رماها ورا ضهره وبيفكر ينقذها ازاي ؟ ومش عارف كل واحد مش قادر يقول يلا نفسي ويمشي ويسيبهم على الرغم من كترتهم بس كلهم مرتبطين ببعض ميقدروش يسيبوا بعض بس هيعملوا ايه بيفكروا ازاي يلحقوا نفسهم ووسط تفكيرهم يغلبهم النوم ويناموا …..
**********************************************************
بعد اسبوع يبتدي مروة ومنار يحضروا نفسهم عشان ينزلوا درسهم واللى بعد ما ناهد شرحتلهم ايه النظام التعليمي لازالوا لسة مش فاهمين فيه حاجة…..
ويخرج محمد ومحمود مع بعض يروحوا النادي وسمر وسهر يروحوا يشوفوا اسكندرية ويتفسحوا فيها …..
يجي معاذ عشان ياخد مروة ومنار يوديهم الدرس ….
معاذ : ها جاهزين ؟
مروة : ايوة جاهزين .
معاذ : جاهزة يا منار .
مروة ترد بسرعة : ايوة اكيد جاهزة امال هي يعني نازلة معايا ليه يلا بينا يا منار
معاذ يستغرب من رد فعل مروة وسكوت منار بس يعديها ويطلع وراهم
********************************************************
يوصل معاذ السنتر هو ومروة ومنار ويدخلوا سنتر شيك اوي يقعدوا في مكتب شوية ويجي استاذ حسن صاحب السنتر ومديره …….
حسن : اهلا يا معاذ ازيك ؟
معاذ : الحمدلله انت ايه اخبارك ؟
حسن : احي الدنيا ماشية زي الفل والحمدلله
معاذ : مروة ومنار اهم بنات دكتور خالد
حسن : ماشاء الله انا الولاد كبرونا انما هو مجاش ليه ؟
معاذ : انت عارف مشاغل الدكتور بس هو ان شاء الله هيجي لحضرتك في اقرب فرصة
حسن : ان شاء الله ، بصوا يا بنات انا مش عاوزكوا تتكسفوا من حاجة انا بنتي هتاخد معاكوا ان شاء الله وانتوا اعتبروا نفسكوا المكان مكانكم اى حاجة تحتاجوها تعالوا وقولولي عليها وانا انفذهالكم على طول
مروة بهمس لمنار : الله ابتدناها وسايط بقى واللى انتوا عايزينه وبتاع
حسن : تعالوا معايا اوريكم القاعة اللى هتاخدوا فيها .
******************************************************
في القاعة البنتين قاعدين ……
مروة: منار انا هدخل التواليت اوك
وتقوم مروة وتسيب منار قاعدة لوحدها ……
شوية وتيجي بنت تانية تدخل فتشوف منار …. اول ما تشوفها تمشي ناحيتها ببطئ وتخبط على كتفها …..
البنت بكل غرور : هاي انا هبة بنت استاذ حسن صاحب السنتر
منار : ………
هبة : انتى جديدة هنا ؟ صح ؟
منار : ………
هبة : انتى اسمك ايه ؟
منار : ………..
هبة بزعيق : انا مش بكلمك انتى مش بتردي ليه ؟
على دخول بنتين كمان وولد شايفين هبة بتزعق ……
تيجي مروة بسرعة وهي سامعة الزعيق وتخبط بكل برود على كتف هبة …… وتديرلها هبة …
مروة : في حاجة ؟ شايفاكي بتزعقى وهيطقلك عرق مالك ومالها ؟
هبة : انا عمالة بسألها انتى اسمك ايه وجاية منين وهي ولا هي هنا .
مروة بكل برود : طب وايه يعني ؟ وانتى مالك هي مش عايزة تكلمك هي حرررررررررررررة
هبة تحاول تجر ناعم : انا مش قصدي والله انا بس عايزة اتعرف عليها انا هبة بنت استاذ حسن
وتمد ايديها تسلم على مروة ….. وتسلم مروة بطرف ايديها عليها
مروة : وانا مروة ودي منار وابعدي بقى شوية عشان النفس .
هبة بأبتسامة صفرا : اوك اتشرفت بمعرفتكم اوي .
وتبعد هبة وتروح للولد والبنتين
واحدة من البنات : ايه مالك ؟
هبة : بعدين ابقى اقولك ؟
التانية : يعني ايه ؟ انا اخر مرة شوفت نظرة الشر دي في عينيكي حصلت مصايب انتى ناوية على ايه ؟
هبة بنظرة خبث : ناوية على نية سودة .