رواية ظلمات امرأة منسية الفصل الرابع عشر 14 بقلم هالة آل هاشم – للقراءة المباشرة والتحميل pdf
وطبعاً جهاد ما اقتنع و صار يسوي مشاكل اكثر من الاول و أكثر من مرة هَد عليه بالبيت و كسر الباب تكسر الى ان عفت البيت و رحت لعمتي من هشام و يا طلابة الما تخلص اجاني لهناك و ضل يحاول وياهم يطلعوني اله بس هشام وكف بوجهه اكثر من مرة الى ان مرة تعاركوا بيناتهم اني هنا مسكتت و گلت لازم اخلي حد بنفسي طلعتله و اني اشتعل و انطفي بغضبي
جهاد : سارة اعرف انتِ تحبيني ليش تريدين تهدمين كل شي بنيناه !؟
-ما بيناتنا شي مبني جهاد كل الي بينا حطام بحطام و انت بسوايتك الاخيرة قطعت كل حبال الود اترجاك روح طلكني ماريد اشوفك بعد !
-سارة هذا اخر كلام عندج ، حطي عينج بعيني و كوليلي ماريدك و لا احبك و اني اوعدج بعد متشوفين خلقتي !
رجف گلبي من سمعت حجايته الاخيرة و صرت اسأل نفسي هل صحيح أكدر على فراگه و صدك راح اتحمل بعد ما اشوف وجهه ؟!
ضل يضغط عليه جاوبي سارة و صوته جان يصدح بالطرمة و حتى الجيران صاروا يسمعونه ، وقتها صدك صرت بموقف لايحسد عليهِ اباوع لنفسي انفضحت و اباوع لبيت عمتي انسلبت راحتهم و لهشام الهادئ شلون طلع من طوره و صار يتعارك وياه كلما يشوفه ، استجمعت كل قطرة شجاعة عندي و گلت يله سارة هي موته لو موتين و اني متت اكثر من مرة قبل ، خليني اموت نفسي هالمرة بداخل گلبة واخلي نهاية لهذه القصة .