وهيدخل ملايين علينا.
محمود (بهدوء باين إنه متصنّع):
هو إحنا ناقصين ملايين؟
(يبص للدكتور مازن)
ولا إيه يا دكتور؟
مازن (بثقة):
المشروع ده لو اتعمل يا محمود،
هيخلّي الثروة السمكية في مصر في حتة تانية.
وكمان ممكن نصدّر برّه.
محمود (بنبرة فيها سخرية خفيفة):
إيه يا دكتور…
هو إنت هتسيب الطب وتشتغل صيّاد وبتاع سمك زينا ولا إيه؟
أظن الدكتورة ناهد اختارتك علشان مش لك في الزفارة زينا.
ناهد اتشدّت من الكلمة.
بس حاولت تفضل هادية.
محمود كمل وهو باصص لحسام:
أنا مش هعمل مزارع سمك،
ولا هوقف حال الصيادين.
مصر واسعة…
تقدروا تنفذوا بعيد عني.
الحفلة سكتت ثانية.
الكلام وقع تقيل.
مازن حاول يظبط الموضوع:
إحنا مش جايين نقطع عيش حد يا محمود،
بالعكس… ده تطوير.
محمود (بحدّة مكبوتة):
التطوير ما يكونش على حساب ناس بتاكل عيشها من البحر.
أنا مش هبقى سبب في إن صياد يقعد في بيته.
ناهد بصّت له بنظرة طويلة:
أنت دايمًا شايف الموضوع من ناحية العاطفة يا محمود.
الدنيا بتمشي بالحسابات.
محمود:
وأنا بحب أمشيها بالضمير.
والاتنين مش دايمًا بينفعوا مع بعض.
نورا كانت سامعة من بعيد.
قلبها مقبوض.
حاسّة إن محمود مش بس رافض المشروع…
ده رافض كل حاجة جديدة.
كأنه بيقف قصاد أي تغيير.