قفل الباب وراه بإيده
بيت جوزك؟!
لا يا منار… ده بيت أسرارك!
وبيتك اللي مليان لعب على الحبلين! ياترى جوزك المحترم لما يعرف إن مراته رانيا هانم ، مش رانيا هانم ، وإنها التعبان اللى لابد علشان يقرصه هيعمل فيكى ايه !؟
ابتسام (بتوتر):
لو سمحت يا أستاذ عصام، الكلام ده ما يصحش هنا،
ياريت تمشي بهدوووء!
عصام (باحتقار):
وإنتِ مالك؟!
داخلة في الموضوع ليه؟!
منار (بصوت عالي):
امشي يا عصام،
لو حصلت مشكلة هنا مش هتطلع منها سليم!
عصام (يقرب منها خطوة):
مشكلة؟!
دانا جاي أفكّرك بالاتفاق يا هانم…
ولا هو لما قلبك مال لمحمود نسيتِ كل اللي كان بينا؟!
ابتسام (بصدمة):
بينكم؟!
إنت بتقول إيه؟!
منار (بتحاول تسيطر على أعصابها):
ما تسمعيش كلامه يا ابتسام،
ده بيهدد وبس!
عصام (بابتسامة خبيثة):
بهدد؟!
ده أنا لو فتحت بُقي بكلمة واحدة…
جوزك المحترم يعرف إن مراته مش زي ما فاكر!
منار (بعياط مكبوت):
إنت عايز إيه بالظبط؟!
فلوس؟! نفوذ؟! ولا بتنتقم؟!
عصام (يقرب قوي):
أنا عايز حقي يا منار…
وعايزك تفضلي فاكرة
إنك مهما عليتي…
لسه في إيدي ورقة تهد كل اللي بنيتيه!
ابتسام (تقف بينهم):
كفاية!
إنت تطلع بره حالًا!
وإلا هكلم البوليس!
عصام (ضحكة مستفزة):
بوليس؟!
خليهم ييجوا…
بس ساعتها محمود باشا يعرف كل حاجة!