أم حسام:
اللي ما يجيش بالحق…
ييجي بالحيلة.
الكل مستني…
والنتيجة قربت.
بس اللي جاي…
مش هيغيّر ورق.
ده هيقلب الطاولة كلها.
بعد كام يوم …….
المعمل كان هادي بشكل يخوّف…
الهدوء اللي قبل العاصفة.
رانيا قاعدة على الكرسي، إيدها في إيد محمود، أنفاسها متقطعة، وعينيها على باب المكتب اللي فيه النتيجة.
قلبها بيدق كأنه هيطلع من صدرها.
محمود (بصوت واطي، ثابت):
افتكري… مهما اللي هيطلع، انتي مش لوحدك.
رانيا هزّت راسها، بس عينيها كانت بتترعش:
رانيا:
أنا مستعدة لأي حاجة… بس مش مستعدة أرجع تاني واحدة ملهاش أصل.
محمود شدّ على إيدها:
محمود:
انتي ليكي أصل، وحقك مش هيضيع.
باب المكتب اتفتح…
الدكتور خرج، وفي إيده الملف.
الكل وقف.
أبو النور قرب بخطوتين، عينه مليانة شك وترقّب.
ناهد كانت واقفة بعيد، قلبها بيدق بعنف، وعينيها مليانة نار.
الدكتور (بنبرة رسمية):
نتيجة تحليل الـDNA…
تؤكد بنسبة 99.9%…
إن الآنسة رانيا…
هي الابنة البيولوجية للسيدة ثريا المراكبي.
الوقت وقف.
رانيا حست الدنيا بتلف بيها…
دموعها نزلت من غير ما تحس، إيديها رعشت، وصوتها خرج مبحوح:
رانيا:
يعني… أنا… أنا بنتها؟
محمود ضمّها بسرعة، مسك وشها بين إيديه:
محمود:
أيوه يا رانيا…
أيوه يا منار.