حتى الضحك كان محسوب.
لف بوشه ناحية الشباك،
البحر كان قدامه، ثابت… تقيل:
– حتى لما اتعلمت،
وكملت شهادتي في الجامعة،
كنت عارف إن مكاني هنا،
مش جوه مكتب ولا بين ورق.
مكاني وسط المراكب،
وسط البحر اللي بيطلع أقسى ما فينا.
سكت شوية، وبعدين قال بصوت واطي:
– حبيت بنت عمي قوي…
حبيتُها بصدق،
بس هي ما حبتنيش.
اتجوزت زميل ليها
وسافروا بريطانيا،
وسابتني أواجه البحر لوحدي.
بلع ريقه، وقال:
– يومها حسّيت إني اترفدت من قلبي.
اتنهد جامد وكمل:
– وأبويا…
أبويا ما سألش.
حكم.
قال لي أتجوز أختها الصغيرة.
عشان الاسم،
وعشان العيله والميراث
وعشان شيخ الصيادين ما ينفعش يتهز.
رفع عينه لها وقال:
– ومن ساعتها وأنا عايش صح قدام الناس،
وغلط جوا نفسي.
صوت الموج دخل من الشباك،
والغرفة كانت ساكتة،
كأن البحر نفسه واقف يسمع اعتراف
اتقال لأول مرة
بين أربع حيطان…
قالت له وهي بتبص في عينه:
– حبيت بنت عمك؟
وسكتت ثانية، وبعدين كملت بهدوء:
– بس واضح إنك حبيتها حب تاني…
مش زي الأول خالص.
قامت وهي بتعرج على رجليها،
راحت ناحية السفرة وجابت طبق الفاكهة.
رجعت وقفَت قدامه، ومدّت إيدها له.
إيدها راحت على التفاح…
اترددت لحظة،
وبعدين غيرت اتجاهها وراحت على الجوافة.
ابتسم من غير ما يحس.