حمدى : فاتحه بيتك لواد صايع يا نوجا وبتسمعى كلامها والله لو خدتها من هنا ما ها تشوفيها تااانى
نور بتريقه : ليه ها تتفق على خطفى زى العربيات ولما انت متفق مع زفت الطين سامى سايب المهندس يشيل الليله ليه مش حرام عليك حياته وسمعته وأمه بتعمل كدا ليه وعايز توصل لإيه
حمدى : انا ما اعرفش ان سامى ها يعمل كدا ولا اتخيلت انه عملها ولا قصدى أورط المهندس فيها افهمى بقى ابوكى مش وحش لو اتعلمتى الاخلاق يبقى اتعلمتيها منى بس انتى لازم تتظبطى خلاص محدش همك بقيتى زى القطر بيشيل كل الا قدامه متخلنيش احرمك من كل حاجه افعالك بقت تخوفنى
نور : إلغى التوكيل لو خايف منى واكتب املاكك بأسم مراتك الحلوه وابنك انا مش عايزا من فلوسك قرش واحد إلا كل شويه تهددنى بيها .. احنا إلا بنعمل الفلوس مش هى إلا بتعملنا
حمدى بأسف : يا خسارة تربيتى ليكى يا نور .. يا خساره . كلهم كانو عندهم حق لما قالولى تربيتك كلها غلط فى غلط .. كنت بفتخر بيكى واقول بثقه ابنى وسندى ماعرفش ان ها يجى اليوم وتبقى عله وتكسرينى قدام الكل وتوقفيلى على الوحده .. وان كان على التوكيل ها اوقفه يانور رغم ان عمرى ما دورت وراكى ولا اعرف حتى عندى ايه بس خلاص مش ها تاخدى مليم واحد طول ما انا عايش وإلا كنت ها اعمله من وراكى ها اعمله قدامك وغصب عنك انتى مش ها تنزلى شغل تااانى ليا انتهت