رواية سبر اغوار قلبي ولكن الفصل الرابع والاربعون 44 والاخير بقلم نورهان سامي – للقراءة المباشرة والتحميل pdf

بدأت نيفين تقص عليها كل شئ .. كل ما حدث لتشهق تالا من بين دموعها .. لكنها توقفت فجأة عن بكائها و شهقاتها عندما سألتها نيفين : هتعملى ايه يا تالا بعد لما فشلت في مساعدتك ؟

أخذت نفساً عميقاً ثم قالت بثقة : قولتلك قبل كده يا نيفين ليا رب كريم ياخد حقي منه

.. أنا واثقة إن ربنا هيخدلى حقي

تنهدت و هى تقول : و نعم بالله .. صمتت لبعض الوقت لم يعد هناك كلام تتحدثان به .. شرعت تالا بالحديث و هى تقول : احيكى يا نيفين إنك تخلصتى من واحد زي ماجد و إن شاء الله بنتك ترجعلك

بكت نيفين بشدة ثم جمعت شتات نفسها و قالت بصوت متحشرج : شكراً يا تالا

صمتت قليلاً ثم أردفت : تالا قولي لجوزك .. قولي لجوزك و متخبيش عليه خليه يعرف منك انتٍِ بدل ما يعرف من غيرك و ساعتها الغفران هيبقى صعب أكملت قائلة : و مين يعلم مش يمكن ربنا يسخره ليكِ عشان يكون سبب في مساعدتك و نجاتك من الفضيحة

بكت تالا بعد كلماتها و هى تقول بصوت متهدج : مقدرش يا نيفين .. مقدرش أقول لأدهم على حاجة زي ديه .. مقدرش

ظلت نيفين صامتة لبعض الوقت ثم قالت : أنا نصحتك و أنتِ حرة

أغلقت نيفين معها الخط لتجلس تالا بمكانها و تبدأ بالبكاء .. بكت .. بكت بضراوة بعدما فقدت أخر أمل لها .. الطريق أصبح ضبابياً معتماً أمامها .. تريد شعاع نور يرشدها للصواب حتى تخرج من طريقها هذا حتى لو كان شعاعاً خافتاً بسيطاً .. لا تعرف ماذا تفعل .. ألقت بجسدها على السرير فقد شعرت بالدوار .. سمعت صوت وصول رسالة جديدة تصلها .. فتحتها لتجد محتواها ” أول ما جتلى مسج إنك فتحتى الموبايل حبيبت أصبح عليكِ رغم إني زعلان منك .. كده يا توتة قلبى تقفلي موبايلك عشان تعرفي تخدى رحتك مع البية جوزك بجد مضايق أوي منك .. إزاى مش مقدرة مشاعري و غيرتي عليك .. بس أنا همشى ورا قلبي و هسامحك .. عارف إنك مش هتردي عشان كده اختصرت الطريق و بعت رسالة .. تفكير غبى أوى إنك تقولي لنيفين بس عجبني و جه في مصلحتنا يا توتة قلبي .. طلقتها لما طلبت هى الطلاق .. أنا كده مش ظالم .. هى طلبت و أنا عشان طيبة قلبي و توتته نفذت .. يبقى عداني العيب و أزح واتزاحت نيفين من طريقنا .. قدامك يومين بالضبط تطلقي من أدهم .. بعد كده هبعت الفيديو و مش هيهمنى بس مش هعمل زي المرة الأولى و أحذرك يا تلحقي يا متلحقيش .. لا أنا هبعت من غير حتى ما بلغك بس هتعرفى لما البيه جوزك ييجي يديكى علقة موت و يطلقك هتوحشينى يا توتة قلبي لحد أما تطلقي .. بجد محتاجك أوي في حياتي أنا و توتة الصغيرة “