رواية سبر اغوار قلبي ولكن الفصل الثامن والثلاثون 38 بقلم نورهان سامي – للقراءة المباشرة والتحميل pdf
تالا بتساؤل : و بعد ما كنتِ بتسكتى كان ايه اللى بيحصل ؟
ابتسمت منال و قالت بجدية : كان بيجى يعتذرلى حتى لو أنا اللى غلطانة لما يحس انه زاد أوى فى الزعيق و كان بيفتكرلى دايماً سكوتى وقت عصبيته و بيشلهالى جميلة لدرجة أن لو صوتى على عليه فى مرة أو زعقت .. كان بيلتمس لى العذر زي ما أنا بلتمس له العذر وقت عصبيته .. الحياة الزوجية السعيدة اللى المراكب بتمشى فيها هى لما الطرف التانى يشد الطرف الأول يرخى و العكس مش الطرفين يشدوا لحد أما العلاقة تدمر .. تعرفى طول التلاتين سنة اللى عشناهم مع بعض عمر ما ايده اتمدت عليا ولا فكر إنه يعملها .. أردفت بجدية قائلة : أصل هيمد ايده عليا ليه و هو لما بيبقى هو متعصب بهدى أنا نفسى و أسكت عشان مستفزوش
نظرت لها تالا بدهشة و قالت بجدية : طب ما هو ممكن يفتكر إن هدوئك ده برود أو إنك مش مهتمة بالكلام اللى بيقوله فيتعصب عليكِ أكتر
منال بجدية : فى فرق بين هدوء و هدوء .. أنا كنت ببقى هادية بس بسمعه ومابحسسهوش إنى هادية لدرجة إنى مطنشاه أو ببقى هادية و ببصله و نظرة السخرية مرسومة فى عينى بستهزء بكلامه
صمتت تالا لبعض الوقت تفكر بكلماتها و قالت بدهشة : أنتوا علاقتكوا كانت مثالية بشكل غير إعتيادى .. مفيش زيكوا دلوقتى .. دلوقتى بقى كل فرد فى العلاقة بيفكر فى نفسه مابيهمهوش التانى و بعدين حضرتك نفسك شخصية مثالية عندك ثبات إنفعالى بتقدرى تتحكمى فى نفسك حتى لو غضبانة و تهدى عشان متشدوش مع بعض