– أصلان :
مقدرش أزعلها دى روحى يا جدى .. بس غصب عنى كل ما أتصور
أنها كانت ممكن تبقى من نصيب رائد بحس بخنقة وضيق شديد ..
الحمد لله .
– الجد متنهدا :
ربنا يخليكوا لبعض يا بنى .. و يرزقكوا بالخلف الصالح .
– السيدة نعمة و أصلان : اللهم آمين .
– الجد أكمل حديثه :
أنا عارف دماغ صفية مرات زاهر .. هى صممت تيجى فى الوقت ده
بالذات ليه .. عاوزة تورينا البت خطيبة زاهر و تمد لسانها لينا .. وتقول
أدينى خطبتلوا اللى على مزاجى وكسرت كلمتكوا و جبت واحدة أحسن
من اللى انتوا أختارتوها لابنى .. بس مش ده اللى أنا خايف منه .. اللى خايف منه هو لما
يشوفوا زهرة .. و طبعا مش هوصيكوا تاخدوا بالكوا منها و متتسبش لواحدها أبدا فاهمانى يا نعمة .
– السيدة نعمة التى شعرت بالفخر لأن زهرة كنتها و أن صفصف لن تأتى لابنها من هى أحسن نسبا أو أخلاقا أو أجمل من زهرة .. ابنها الذى لطالما تفاخرت به و قارنت بينه و بين أصلان ابنها بل و سخرت منه أيضا لأنه اختار دخول كلية الزراعة بدلا من أحد كليات القمة ليرضى جده :
إن شاء الله يا عمى.
– الجد :
أصلان وصى الرجالة يدبحوا عشان الأكل .
– أصلان :
حاضر يا جدى متوصيش حريص .. دى عمتى الغالية و البت بوسى الهبلة .