في القرية ،،،،
كان الحاج فاروق قد اتصل بالمحامي يسري ليجهز له الأوراق الخاصة ببيع الأرض ، ثم عقد العزم على السفر فوراً للسبدة هدى لانهاء الاجراءات و…
-سامح: رايح فين يا بوي ؟
-فاروق: هدلى مصر
-سامح: دلوجيت ؟
-فاروق: أيوه ، خير البر عاجله
-سامح: بس يا بوي آآآ..
-فاروق مقاطعاً: مافيش بس ،أني عاوز أخلص بجى من الموضوع ده خلينا نفوج لمصالحنا المتعطلة
-سامح: هــه
-فاروق: أني مش هتأخر ، هخلص الورج وأرجع على طول
-سامح: استنى يا بوي أنا جاي إمعاك
-فاروق: بس يا ولدي آآآ…
-سامح: مش هاسيبك يابوي لوحدك ، وبعدين أني مش ورايا حاجة أعملها
-فاروق: الأمر لله يا ولدي ، يالا بينا
-سامح: ماشي
……….
عودة مرة أخرى إلى زياد ونور ،،،
عاد زياد إلى المنزل بعد أن اشترى بعض الملابس لنور و..
-زياد: يا أهل الدار ، أنا جيت
-نور من الداخل : كويس
-زياد: ايه ده ؟؟؟ ايه اللي انتي عمليته في هدومي ؟؟
-نور: قولت أتصرف لحد ما تجيبلي هدوم
قامت نور بقص البنطال الخاص بزياد ليصير مشابهاً لـ ( البرمودا) وتوليفه بطريقة مضحكة لكي ترتديه
-زياد: تقومي تقصي بنطلوني ؟؟؟ انتي عارفة ده بكام
-نور: بكام يعني ؟؟ وبعدين خسارة فيا ؟؟
-زياد: لأ خسارة ليا !!!
تحسر زياد قليلاً على البنطال الذي أفسدته نور فقد كان ثمنه غالياً و…
-نور وهي تجذب الأكياس من يده : ها جبتلي هدوم
-زياد: ايوه
-نور وهي تقبله من خده دون قصد : الله ، ميرسي أوي
-زياد: ايييه اللي عملتيه ده