رحمه: هتطبخيها النهارده
امينه: لاء اول يوم رمضان
وهنا ينزل الاطفال
يوسف: خالتي ام رحمه عايزين عشرين جنيه عشان زينه رمضان
امينه: ياله ياواد انته وهو من هنا مافيش فلوس
يوسف: عاجبك كده يا ست رحمه مش قولتي تعالو خدو فلوس الزينه من امك
امينه: الله يخربيت اهلك موراكيش غير النصايب
رحمه: ما انا لسه مدياكي فرخه اهو خلاص يا عيال روحو لابويا الورشه وهو هيديكم الفلوس
امينه: ورحمه امي يا رحمه لارنك علقه تحلفي بيها
رحمه: قول يا فكيك
لتنزل رحمه جري مع الأطفال
رحمه: تعالو نروح عند ابويا
لتذهب رحمه مع الاطفال الي ورشه ابيها
رحمه: أبا عايزين فلوس الزينه مراتك مرضيتش تدينا
صابر: وعايزين كام
رحمه: عشرين جنيه
صابر: خدو وروحي علي البيت انتي فاكره نفسك صغيره عيب عليكي انتي كبرتي علي كده
رحمه: خليك حلو بقا
صابر: ربنا يهديكي يا بنتي وافرح بيكي
لتترك رحمه والدها
رحمه: ياله يا عيال روحو لمو فلوس الزينه من باقي أهل الحاره ونتقابل تحت شباك عم خليل
الاطفال: وجب
ليتركوها الاطفال ليذهبو ليجمعو فلوس الزينه
وبعد ساعه يتجمع الاطفال
رحمه: عملتو ايه يا رجاله
يوسف: تمام لمينا من كل أهل الحاره
رحمه: بقولكم ايه عاوزين نعلق فانوس ف نص الحاره
سعيد: بس الفلوس مش هتكفي