“وأنا كمان معاكم.”
لفّينا ناحية الصوت،
كانت نجاة، وعينيها مليانة دموع.
فتحت دراعاتي،
جريت عليّا وحضنتها بقوة.
مدّيت إيدي لعمر،
ودخل معانا في الحضن.
بعدنا،
طلع عمر مفتاح من جيبه وحطه في إيدي.
“خد ده مفتاح شقتي في التجمع، خد مراتك وابعدوا عن هنا يا إلياس.
ندى شافت كتير… كتير أوي، إنت سيبتها ومشيت من غير ما تقولها حاجة، والناس ما سابوهاش في حالها، خدها وامشوا.”
بصّيت له بعين مليانة نار.
“مش همشي من هنا يا عمر غير لما أجيب حق السبع سنين، وحق مراتي، وحق كل كلمة اتقالت في سيرتها، مش همشي غير لما أندّمهم كلهم… ماشي؟”
قعدت في غرفتي القديمة،
إحساس الدفا والسرير نعمة لا توصف.
كنت خايف أصحى من الحلم،
كل مرة نفسي أصحى منه ويطلع كل ده كابوس،
لكن ده طلع حقيقة.
خايف أصحى ألاقي نفسي لسه في الكابوس،
ولسه في السجن،
بتعذب على حاجة ما عملتهاش،
ولأني ما كانش معايا دليل
اتحكم عليّ بسجن سبع سنين من عمري.
المخزي في الموضوع
إن ما فيش حد من عيلتي دافع عني،
ولا ساعدني،
ولا قال ابننا ما يعملش كده.
لكن اتكتب عليّ
أعيش في عيلة تحكم عليّ بالباطل
بسبب واحدة…
وغلطة صغيرة.
لكن الحمد لله
عندي يقين في الله.
بس ندى…
ندى هتصدقني؟
ولا هتصدقهم؟
ظلمتها كتير…
أنا عارف.