وهدأت نبرته قليلًا، كما لانت قسماته أكثر وهو يردد بشفقة لحال أبنائه :
– ربنا خلقنا قدرات، وكل واحد فينا قدرته تختلف عن التاني، فيه ناس تقدر تعيش من غير جواز أو حب، وفيه ناس ما تقدرش تعيش كده.. ربنا له حكم في خلقه يا ابني.
هتف به “عبد الرحمن” ساخرًا :
– حق مين يا والدي، وإحنا حقوقنا كانت فين لما كنا خمس سنين ومحتاجين أم تطبطب وتضم، أم تحضن وتكبر، أم تدفي و تغطي.. حقوقنا فين يا بابا؟.. وبعدين إيه الصح لما أكون مآمن لشريكة حياتي ومديها عمري وكل أحلامي إننا هنكبر سوا.. إننا هنربي عيالنا ونفرح بيهم سوا، وفجأة ألاقيها تقولي آسفة مش هقدر أكمل.. ألاقيها تطعني في ضهري بكل برود وأنانية!.. لما تسيبي في وسط الطريق يبقى أحترمها ليه يا بابا؟ .. الست دي ملهاش أي حقوق عندنا، ولو حتى ماتت مش هدعيلها ولا هقرأ عليها الفاتحة.. بعد إذن حضرتك.
وهرول مغادرًا الغرفة تحت أنظار والده المتألمة وأخته التي نهش قلبها وحش ذكريات مريرة.