رواية خطايا واجتثاث الفصل الثاني 2 بقلم نور البصري – للقراءة المباشرة والتحميل pdf

عزا جان متوقع راح اسويها بغضب غميته و ركضت بعيد رجعت بداخلي روح طفلة..

خرجت من مقبرة الاجتثاث حتى اتنفس بنتي بعد ما اختنقت بيه ومتت سنين ردتلي الروح ببنتي..

كولشي مريد الحب وخسرته والعشرة هانت من زمان واني المذنب الهونتها

بس بنتي يا ناس اخاف ازمه من الأزمات اموت وممكحله عيني ببنتي..

كل ازمه اكول اموت رغم النوبات الي اعانيها مو مميتة بس تاخذ كل حيلي قربت كلاص المي من شفايفي وخليت حباية من دواي شوي تخفف من تشنجات العضلات الي تجيني العلاج ماسوى شي ولا قلل الآمي..

نظرات صاحبتي إلي تحجي بين تأيد اواجه ماضي وبين خوف من نهاية المواجهة لا تصير مميته..

فظلت مرة تشجعني ارجع و اطالب ببنتي واواجهة و بين تكولي لترحين و بنتج حاولي تلكين تواصل بينكم عن طريق النت..

تخاف على حياتي تخاف لا الموت بالمرة الجاية يكون موت جسد مو بس روح

يارب ساعدني هذا القرار كان لازم مو من هسه من قبل بس ما جنت متهيئة نفسيا ولا جسدياً..

ورى تفكير قررت اواجه ماجد.. واذا مكتوب الي كفن مكدر ااخر موتي بعد..

رجعت اصفن بالصورة الطبعتها واني ابتسم اعرف مراح يلاكوني بالورود ولا بالاحضان

اعرف طريق استرداد عائلتي مملي شوك و صعوبات ويجوز رفض و يجوز خسارات ويجوز اصلا بنتي بنفسها ترفضني بس لازم اجاهد حتى لو ثمن مجرد شوفتها ادفع حياتي.