_ انتي عايزة تخلي عمر يحبك بالسحر يا فريدة
= ايوه يا مريم ومستعدة اعمل اي حاجه عشان يحبني.
شهقت بهلع وهي تشاهد هذا اللقاء التلفزيوني الذي يذاع على احدى القنوات الفضائية وترى هذا الساحر الذي تتحدث عنه جميع القنوات وتنتشر اخبار كثيره عنه عبر المواقع الالكترونيه ويتحدث الجميع عن قوة سحره وقدرته الكبيرة في تغير حياة البشر، نظر اليه مقدم البرنامج وتحدث بفضول:
– تقدر تشرح للسادة المشاهدين يعني ايه بتقدر تغير حياة البشر؟!
ابتسم الساحر بثقة:
– يعني اي حد بيتمنى حاجه بساعده في تحقيقها من خلال سحري
لم يفهم مقدم البرنامج ما يقصده ليسأله مرة اخرى:
– ممكن تشرح بوضوح اكتر، يعني انا مثلاً لو عندي حلم، تقدر من خلال سحرك تحققلي الحلم دا؟!.
تحدث الساحر بثقة:
– طبعا اقدر
ابتسم مقدم البرنامج وتحدث بسخرية:
– يعني عايز تقول ان حضرتك المصباح السحري!!
تحدث الساحر بتأكيد:
– حاجه زي كده
اندهش مقدم البرنامج من ثقته القوية بنفسه وتحدث اليه بإتهام:
– بس مفيش حاجه اسمها سحر واي حد بيقول على نفسه ساحر وانه يقدر يغير حياة البشر يبقى نصاب
ثم ذكر مقدم البرنامج الحديث الشريف
– قال رسول الله ﷺ “من أتى عرافا فصدقه فيما قال فقد برئت منه ذمة الله ورسوله”