_ والله يا بنتي قلت له وحاولت معاه، بس لقيته اتعصب فجأة وقام وهدد برفع قضية علينا، وقدامنا أسبوع.
حطت إيديها على وشها بضيق وعصبية وقامت بسرعة وهي رايحة ناحية الباب، وقبل ما تطلع سألتها مامتها:
= رايحة فين يا ملك
_عند عمي.. هروح أكلمه وأحاول معاه.
=بلاش يا بنتي تروحي.. روحتك هتكون على الفاضي، أنا جربت كتير أوي وفي الآخر ولا كأنه سمع حاجة وكبر دماغه وعمل اللي نيوي عليه
_ هجرب وخلاص يا أمي مش هنخسر حاجة، ولو ما نفعش يبقى ما فضلش غير طريقة واحدة
= هتعملي إيه
_ هتعرفي بعدين.. سلام.
قفلت الباب ومشيت، وأخدت عربية أجرة ووصلت، وبصت لبيت عمها اللي كان يوازي بيتها مرتين بسبب حجمه الكبير، ونزلت واتجهت ناحية البيت وهي بتشوف تفاصيله بتركيز؛ فهي ما راحتش غير تلات مرات أو أقل تقريباً رغم قرب المسافة، إلا إنها مش بتحب تروحه وده بسبب إساءة معاملة ولاد عمها وبناته، إلا شخص واحد مابينهم، ما تعرفش إن كان فاكرها ولا لأ، فهي ما شافتهوش غير مرة واحدة بس وكانت صغيرة وقتها.
خبطت على الباب واستنت دقيقة لحد ما فتح، وشافت بنت في نفس عمرها تقريباً أو أكبر، وبمجرد ما شافتها بصت لها باحتقار وقالت:
_ يا أهلاً وسهلاً.. تعالي يا ماما شوفي مين اللي شرفنا في بيتنا، بعد تلات سنين ما رفعتش علينا سماعة تليفون حتى