عبدالقادر : لو كل أم وأب يعرفوا نتيجة تعليمهم الشر لولادهم هتبقى نتيجته أيه ، زي أم راضي كدا فضلت تزرع في نفس أبنها الكره من ناحية أخوه لغاية لما كره أخوه وبلده وكره حتى نفسه وخسر دنيته وأخرته كمان
حسين بأسى : عندك حق يا سيادة اللوا ، بس الشهادة لله راضي جتله فرص كتير يتوب لربنا بس هو اللي نفسه مريضة وطمعه فاق كل الحدود ، دا أخد ميراث عبدالله في أبوه بالنصب والتزوير وبردو مشبعش وأدور يتمسكن لعبدالله ويتحايل عليه وياخد منه فلوس سلف وميرجعهاش
عبدالقادر : ممكن تكمل يا حسين بيه
حسين : فريد بيومي أستغل راضي عشان هو أخو عبدالله ومش فريد لوحده كان معاه واحد من الكبار سنده قوي
عبدالقادر : صالح نعيم مش كدا
حسين : أيوه يا فندم صالح نعيم
عبدالقادر : وبعدين كمل يا سيد حسين
حسين : التلاتة فضلوا يحاولوا مع عبدالله بكل الحيل بس عبدالله فضل على مبادئه والتزامها وخوفه من ربنا لكن التلاتة مسكتوش وفضلوا يدبروا لحد ما حصل اللي حصل وراح عبدالله ومراته وأولاده ضحية ليهم
عبدالقادر : وبعدين أيه اللي حصل بعد الحادثة
حسين : راضي وفريد كأنهم فص ملح وداب فضلت أدور عليهم كتير قوي عشان أنتقم منهم لموت أخويا وأعز أصحابي بس للأسف ملقتهمش