وقفت مكاني بدون رد ف اتكلم هو
= فريده انتِ هتفضلي كده ؟ خلاص مش هنرجع تاني ؟
اخدت نفس طويل ومردتش برضو
= فريده ! انا قولت يمكن عايزه تبقي لوحدها السنه دي وتركز فيها اكتر ف سيبتك بمزاجك وقولت نتكلم في الاخر ، انتِ برضو مش عايزه نتكلم !
_ أيوه
اتصدم ، اتصدم أوي والصدمه بانت علي وشه وقعد يتهته وبعدين رد بعصبيه
= طب ليه ، ما احنا كنا كويسين انا عملت ايه عشان تعملي كده ؟
مكنتش عارفه اقوله ، هو عنده حق هو معملش اي حاجه وحشه بس انا . . . انا اللي خوفي مسيطر عليا ومش هقدر اوصفله احساسي وخوفي من المستقبل ، مش هقدر احكي لأي حد عن قلقي المفرط ده .
رديت عليه بهدوء الي حد ما
_ انت معملتش حاجه انا اللي مش عايزه اكون في علاقه حاليا
= طب . . .
قاطعته وهو بيتكلم وقولتله
_انا لازم امشي دلوقتي، عن اذنك
سيبته واقف ومشيت ، كنت عايزه اعيط جامد واحكيله وهو يطمني بس قررت انه لأ خلاص كده ومش هحكي حاجه .
فضلت في صراع بين عقلي وقلبي لمدة شهر ونص تقريبا النتيجه بانت ف اتصدمت من مجموعي ودخلت في اكتئاب فتره ، لما فوقت منه كنت بطلت افتكر او افكر في ليل ، الدنيا شيلتني هم كبير عليا مبقتش عايزه ولا قادره افكر في حد تاني ولا احب حد ، نسيته ونسيت ذكرياتنا سوا ومكنش عندي اي فضول اعرف اخباره وقد كان ، بقالي سنتين اهو معرفش عنه حاجه ولا بشوفه نهائي .