كنت حاسه اني لسه مشبعتش من وجوده حواليا ، الدنيا هتاخده مني بعد ما حبيته كل الحب ده .
فوقت ولقيت اني بضيع ولازم اهتم بدراستي ورجعت انزل دروس واذاكر تاني ، كل ده وانا بتجنبه وبتجنب اني اشوفه .
اتأقلمت علي الوضع وبقي فعلا مش فارق وجوده من عدمه ، بس لسه جوايا حاجه بتدور عليه كل ما ادخل السنتر ، لسه قلبي بيرقص اول ما يسمع صوته وبحس بسكون اول ما عيني تيجي في عنيه .
مبقتش عايزاه يفضل بس قلبي لسه بيدق له .
السنه بتخلص وهنبدا امتحانات ، وانا مش فارقلي الدراسه من كتر التوهه اللي حساها في قلبي ، جه الوقت اللي كل الخوف اللي في الدنيا في قلبي منه .
بحضر الامتحان وانزل استناه عشان اشوفه وهو ماشي بحاول اشبع منه ومن ملامحه ، يا عالم هعرف اشوفه تاني ولا لا .
اخر يوم امتحانات قررت اني هنزل امشي علي طول مش هقف اشوفه مش هقدر اشوفه وانا عارفه اني لو حتي هشوفه تاني ف هيبقي كل فتره كبيره وكده كده هو مش بينزل في نص الوقت ، سلمت الورق ونزلت امشي بسرعه لقيته واقف مكاني المكان اللي بستني فيه كل مره ، لفيت وشي للبوابه واتحركت قرب عليا بسرعه
= فريددده استني
حسيت بنغزه في قلبي وجسمي متلج ، ياااه بقالي حوالي سنه مبسمعش اسمي بصوته ، قد ايه هيوحشني صوته وضحكته وكل حاجه فيه والله .