حاولت افكر اكتر افتكرت ان لما صليت استخاره علي خطيبي الاحلام كلها كانت وحشه .
حسيت اني توهت مش فاهمه حاجه بدأت اتكلم مع نفسي
_ هل دي مجرد أحلام ؟ ولا روئ ؟ طب معناها ايه ؟
مسكت دماغي وسكت شويه
_ يا ربّ انا مش فاهمه حاجه ، دبر لي أمري يا ربّ فإني لا أحسن التدبير ، أديني إشاره أتصرف ازاى يا ربّ
قومت من مكاني وانا واثقه إن ربنا هيعملي اللي فيه الخير ، صليت وخرجت لأهلي لقيت ماما بتناديلي .
_ نعم يا امي
اخدت نفس عميق وردت عليا
: انتِ مرتاحه مع خطيبك ده يا فريده
استغربت السؤال ماما عمرها ما سألتني السؤال ده وبتحب خطيبي جدا ، قعدت افكر ومستغربه ايه السؤال ده ف اتكلمت ماما .
: لو في حاجه يا حبيبتي احكيلي ، احنا لسه علي البر ونقدر نلحق نفسنا
_ هو ليه بتسألي كده دلوقتي يا أمي
: انا حلمت حلم وحش عليه واحساسي بيقولي انك لازم تفشكلي ، وانا مش عايشالك العمر كله يا بنتي عايزه اتطمن عليكي
اتصدمت وعيني وسعت ، ف اتكلمت بصوت واطي
_حلم برضو ! لأ كده في حاجه اكيد
طبطبت عليا ماما وقالت
: قولي يا حبيبتي ومتخافيش انا معاكي وفي ضهرك ايا كان اختيارك
لقيتني رديت تلقائي بدون تفكير
_ هفشكل يا امي
معرفش قولت كده ليه بس حسيت براحه والتوهه اللي في دماغي هديت شويه .