أرسلت له ابتسامة صافية وقالت : في البحر، البحر حلو أوي يا عمار.
بعد أن كان جاثٍ على ركبتيه أمامها اعتدل وجلس بجانبه ونظر للمياه بحب قائلًا بنبرة تحمل حزن : كان ممكن تعيشي قدامه عمرك كله، بس أنتي اختريتي البعد اخترتي القاهرة.
التفتت له وقالت مبررة : أنا اخترت هناك عشان تيتة لوحدها ومتعلقه بيا وأنا كمان روحي فيها.
وقبل أن تكمل حديثها، قطعه هو بنبرة قوية : روحك فيها، ولا في حد تاني.
تصاعدت الدماء لوجنيتها، فالأول مرة يتحدث معها عمار بتلك الجرأة وأيضًا بتلك النبرة، كادت تتحدث متلعثمة كاذبة، ولكنها صمتت لبرهة وهي تنظر له وتقرأ ما في عينيه، فوجدت نفسها تقول : كانت روحي فيه، بس خلاص فوقت لنفسي، وعرفت قيمتي عنده، وعرفت قيمتي عند نفسي، فوقت يا عمار، متخافش.
لم تتخيل أن تصل سعادته لهذا الحد عندما تفوهت بذلك الاعتراف، فوجدته يجذب يديها ويقبلها برقة قائلًا بحب: أيوة كدة فوقي واعرفي إنك غالية أوي يا فريدة، أنا كنت هاموت وأنا شايف الحب في عنيكي لحد مايستاهلش ولا مقدره، فوقي بقى واعرفي مين عنده يبيع الدنيا كلها عشانك، وعشان يشوف ضحكة تنور عيونك ووشك…
على جانب آخر ليس ببعيد عن فريدة وعمار، كان يقف كلًا من خالد وأدهم يتابعان فريدة بصمت، وما إن رأى خالد يد فريدة التي كان يقبلها عمار بأريحية، حتى تصاعدت شرارات الغضب بداخله، فتقدم منهم، وهو عازم أن يفصل رأس ذلك الأبلة عن جسده، كيف له أن يتجرأ ويمسك يديها بتلك الأريحية، والأدهى من ذلك يقبلها أيضًا ، عارض طريقه جسد صديقه القوي وهو يدفعه للخلف قائلًا بحسم : أنت رايح فين يا خالد.
حاول خالد أن يبعده عن طريقه قائلًا بخشونة : اوعى من وشي ماشوف الزفتة دي إزاي تسمحله يمسك إيدها بالشكل ده.
تحدث أدهم مستنكرًا من حديث صديقه : وفيها إيه هو مش ابن عمها، زي ما أنت ابن خالتها،وبتمسك إيديها عادي.
رفع خالد أحد حاجبيه ليقول بحزم : أنا غيره يا أدهم، أنا غيره، فاهم ولا لأ.
هز أدهم رأسه بنفي ليقول بنبرة تحمل السخرية : لا مش فاهم الصراحة، أنت يابني ولا خطيبها ولا حتى حبيبها عشان تتحكم فيها كدة.
حاول خالد أن يبعده عنه ليقول بغضب : طب ابعد من وشي، مدام أنت مش فاهم حاجة.
أوقفه أدهم مرة أخرى بسؤاله الجاد : خالد ، فريدة بالنسبالك إيه، أنت بتحبها زي ماهي بتحبك.
هرب خالد بنظراته من صديقه والتزم الصمت، فعاد أدهم وسأله مجددًا: خالد رد عليا، أنت بتحب فريدة ولا لأ؟!
تحدث خالد ليجيبه : آه طبعا بحبها أومال بكرها.
زفر أدهم بحنق وقال : أنت فاهم كلامي كويس يا خالد، وبلاش تحور عليا.
نظر خالد للأسفل وخرج صوته حائرًا : مش عارف صدقني، كل اللي أنا عاوزه إنها تيجي معايا وبس.
ابتسم أدهم وقال باستنكار: مش عارف!!، أنا أقولك يا صاحبي أنت اتعودت إن فريدة تجري وراك، واتعودت إنك تمتلكها، وده اللى جبنا هنا، التملك ، أنت عاوزها ترجع عشان تفرض شخصيتك عليها تاني.
كاد أن يتحدث لولا صوت فريدة المتعجب : خالد أنت بتعمل إيه هنا!!.
التفت أدهم لها وتحدث بعتاب : خالد بيعمل إيه هنا، وأنا كويس جوافة يا ست فريدة.
قهقهت بخفة لتقول بابتسامة واسعة : لا طبعًا، أنت الخير والبركة.
صمتت لبرهة لتعود وتتحدث ببلاهة : اوعى يكون البت نهال بعتتك هنا عشان تجبني، أنا كنت هاجي لوحدي النهاردة بليل، كنت هاخلي عمار يوصلني.
صدم عمار من قرارها المفاجئ ليتحدث بعبوس : أنتي راجعة النهاردة احنا ملحقناش نشبع منك.
التفتت له لتتحدث مبررة قرارها : جدتي وحشتنى يا عمار، متعودتش أبعد عنها، وبعدين أنت ناسي امتحاناتي على الأبواب ولازم أركز في الدراسة شوية…
صمتت لتستشف مدى تأثير حديثها عليه، فوجدته مازال عابس، أمسكت يديه تتحدث برجاء ألا يحزن بسبب قرارها : عشان خاطري متزعلش مني، وعد هاجي في إجازة نص سنة وهاقضيها كلها معاكوا.
ربت عمار على يديها بحب وقال : ماشي يا ديدي هاستناكي.
كاد أن يخرج من فمه قذائف في وجه ذلك الأبلة، ولكنه تماسك لآخر لحظة وقام بجذب يديها بسرعة : طب يالا عشان نجيب حاجتك ونروح.
جذبت يديها بقوة وتحدثت : أنا قولت هاروح مع عمار بليل، زي ما جيت روح تاني.
اقترب منها وعروق وجهه تنتفض بغضب من لهجتها تلك، كيف لها أن تتجرأ وتتحدث معه هكذا : أنتي اتجننت..
قطع حديثه يد عمار التب دفعته بعيدًا عنها قائلًا بخشونة : في إيه هي قالت إيه غلط عشان تزعقلها كدة، أنا زي ما جبتها هاروحها، يالا يا فريدة.
نظرت لخالد بقوة وتحدٍ في آن واحد، وأرسلت له نظرة أخيرة قبل أن تتحرك وكأنها تقول لها، انتهت تلك الساذجة على يدك أيها المعتوه!، تقدمت مع عمار متجاهلة نظرات خالد الحانقة والغاضبة، التفت لصديقه فوجده ينظر لها بإعجاب عما فعلته فقال بزعق : أنت بتضحك عشان كلمتني كدة يا أدهم، مبسوط منها، والله لأربيها لما ترجع.
ابتسم أدهم باستنكار ثم قال : مظنش يا خالد، فريدة القديمة ماتت، وظهرت مكانها واحدة تانية، واحدة لسه هنتعرف عليها واحدة، واحدة، استعد بقى…
التفت هو الآخر ليذهب صوب سيارته وبداخله سعادة بتغيرها البسيط، فحان الوقت أن تربي خالد وتذيقه ما أذاقه لها على مدار كل تلك السنوات!!.
أما خالد فكان يقف مصدومًا منها أولًا ومن صديقه ثانيًا…هز رأسه برفض ليقول لنفسه : قال تربيني قال، ماشي يا فريدة هتشوفي اللي عمرك ما شوفتيه!.