مطت ميسون شفتيها بحزن لتجيبها بضيق
_مش هيجرى حاجة لو ركبتها يا شهد
هزت شهد رأسها لتجيبها بجدية وتملك
_لا دى بتاعتى لوحدى، محدش مين ما هيكون هيقرب منها، انا طلبتها من جدى وهو هداهالى فمفيش اى حد يقدر ياخدها، دى ملكى مش املاك المنشاوية
مطت ميسون شفتيها بحزن، حولت ملك نظراتها بينهم حسناً هى فرسة جميلة من اللون الاسود ولها غرة بيضاء جميلة وكذلك بطنها ابيض عيناها بنية، ولكن من رأيها لا تستحق كل ذلك الجدال، إلتفت برأسها تجاههم بتعجب لتقول بهدوء ممزوج بالرقة مدافعة عن صديقتها
_محصلش حاجة لده كله هى بس كانت هتأكلها، وان ركبتها مش هيجرى حاجة يعنى هى مش هتاكل منها حته
ارتفع حاجبى شهد بذهول لتنظر جهتها ثم جهة اختها متسائلة بتعجب وهى تدقق النظرات لها بانبهار
_مين البسكوتة دى يا ميسون؟ لقيتيها فين؟
ضحكت على اختها لتجيبها ببساطة
_لا ملقيتهاش هى اللى جاتلنا
_هه
اجابتها شهد ببلاهة لتجيبها ميسون بضحك وهى تحيط كتفى ملك بسعادة
_احب اقدملك ملك بنت طنط هنا المنشاوى
_هه
كانت تلك اجابة شهد فى حين فتحت فمها ببلاهة لتنفرط الاثنتان فى الضحك فى حين التفت ميسون جهة ملك قائلة بمزاح
_وانا احب اقدملك شهد اختى ماشاء الله عليها اذكى اخواتها، زى ما انتى شايفة كدة المعلومة بتوصل بعد سنة