_قولى بسم الله لسة شوية على ما الاكل يجهز عند جدتى علشان كدة كوليلك لقمة
ضحكت شهد وهى تخرج علبة صغيرة من الحقيبة هاتفة بسعادة
_لا ما انا روحت بلطجت على الخالة روحية قولتلها عاوزة الكبد والقوانص وتشوحهم بالسمنة البلدى والتوم والبصل والذى منه
هتفت ميسون بتلذذ
_الله لا كدة آكل، ده الخالة روحية وتيتة عليهم خلطة للكبدة دى لا يُعلى عليها
ثم التفت جهة ملك هاتفه بهدوء
_تعالى يا ملك ده انتِ هتاكلى اكلة احلى من اى اكل كلتيه متتكسفيش
ارتفع حاجبى ملك ذهولا لتتساءل وهى تشير جهة الطعام
_هو انتِ بجد شايلة الاكل دة كله فى شنطتك؟
ضحكت ميسون ضحكة رنانة فى حين اومأت شهد وهى تقضم قطعة خيار هاتفة بهدوء
_اه
_كله ده؟
تساءلت ملك بذهول لتومئ شهد برأسها فى حين رفعت عيناها جهتها مجيبة بلا مبالاة
_اه
_وهتاكلى على الطرحة
_اه
كانت ميسون تكتم بالكاد ضحكاتها لتهتف ملك بذهول
_دة كدة الطرحة هتتوسخ
ثم اشارت جهة المانجو هاتفة بهدوء
_وبقعة الفاكهة مابتطلعش
الى هنا لم تستطع ميسون كتم ضحكاتها لتطلقها رنانة هاتفة بمرح
_البنت مصدومة
اجابت شهد ب لا مبالاة وهى تغمس قطعة خبز فى الكبدة
_لا هى هتتصدم اكتر لما تسمع صوت امى بتصوت وتسمع الشارع كله
ثم هتفت تقلد والدتها صارخة
_تانى… تانى اعمل فيكى ايه؟