انا مش بطلب منك كتير انا عارفة انك استحالة تسامحنى وترجع تحبنى وتقبلنى زى الاول، انا عارفة ان كرامتك فوق راسك وانتَ شايف انى دوستها وعارفة ومتأكدة انك بعد اللى سمعته منى استحالة انك تفكر تحبنى تانى وانتَ مش لاقى صدى لحبك جوايا ومش لاقى جوايا غير الفراغ، بس ياريت تقدر وتسامحنى مش كحبيبة.. بس كبنت عمك اللى يمكن غلطت فى حقك وطالبة منك تسامحها وتوريها الطريق، ياريت يا سليم ياريت
ظل ينظر جهتها بغرابة اهذا هو العشق الذى كان يتمناه؟ اهذه هى محبوبته؟ اهذا هو القلب الذى غض النظر عنه وعن اخطائه؟ ظل ينظر جهتها لبعض الوقت ليقول بعدها بألم:
_انتِ معاكِ حق احنا اختلافنا لا يمكن يتلاقى، روحى يابنت عمى انا مسامح بس كونك بنت عمى بس لكن مش مسامح البنت اللى حبيتها لان الواضح ان البنت دى مش موجودة ولا حقيقية، البنت اللى حبيتها كانت من نسج خيالى ف انا اللى غلطان لانى دورت على حاجة فى مكان غلط
ظلت تنظر له لتسأله بتوتر:
_مسامح؟
نظر لها ليقول بهدوء:
_مسامح بس طرقنا افترقت واستحالة تتلاقى ابدا
قال كلمته ليتحرك تاركا المكان لها لتنظر فى اثره بألم فى حين طفرت دمعه بعينه مسحها سريعا وهو يدرك ب انه قد لعب بقلبه بما يكفى لتنتهى قصة حب لم تبدأ
ــــــــــــــــــــــــــــــــــــــــــــــــــــــ