ابتسم بسخرية على حنان والدته ليجيبها بهدوء ورزانه
_بصى يا ماما انا مش هتكلم كتير بس انا بالنسبة لنرمين باكدج مناسب جدا، يعنى شاب صغير، فلوس ومال وجاه وسلطة ومن عيلتها، وضامنانى من ادب واخلاق وانى عمرى ما هخون لان الخيانة مش من طبعى وكذلك هى بالنسبالى كدة، لكن مافيش أى مشاعر موجودة ناحيتها ولا أى حاجة، وجودها عندى زى عدمه، يعنى هتبقى علاقة باردة، انا اه مش بطمح بالحب الاسطورى ولا حب الروايات ولا الشغف العالى زى البنات المراهقة بس برده لازم يكون فيه انجذاب، يكون فيه ارتياح، ويبقى فيه مشاعر ناحيتها حتى ولو ضعيفة لكن ممكن تزيد مع الوقت، فيه أى شرارة بينا، لكن انا بينى وبين نرمين مفيش اى حاجة خالص ولا اى شرارة فيه برود وبس، مفيش مشاعر، مفيش بينى وبينها غير احساس بارد كونها بنت عمى وزميلتى فى الشغل لكن مهما إن حاولت افتح معاها أى موضوع مش بفلح، وبرده حتى لو اتكلمنا مش بيبقى فيه أى حاجة
_يمكن علشان بتفكر فيها كبنت عمك؟
هز رأسه سلبا وهو يجيبها
_حاولت.. والله حاولت انى اتعامل معاها على اساس تانى، حاولت ادور على مشاعر بينا حاجة امسك فيها واقول هى دى، اى دفى لكن اللى بينا مفيهوش غير برود.. بس برود.. علاقة باردة