ثم أكمل بهدوء
_من النهاردة أنتَ موظف عندى فى الشركة، لبسك رسمى، تصحى تكون هناك من تمانية، تصحى من كام تخلص كام ميخصنيش المهم تكون هناك تمانية، التأخير ليه عقاب، هتتعامل زيك زى أصغر موظف عندى، ممنوع التليفون، وإن فكرت انك هتتعامل كواحد من اصحاب الشركة ف أنتَ غلطان، إن كنت فاكر إن نرمين أو ماجد هيساعدوك هتكون بتحلم، وانا بنفسى هتابعك سواء كنت موجود فى الشركة أو لا من خلال الكاميرات.. فاهم
أسقط كفيه متسائلاً بصدمة
_يعنى ايه؟
نظر آدم داخل عينيه ليجيبه بهدوء
_يعنى لازم تعرف قيمة مسئوليتك كويس أوى، كل واحد عنده مسئولية ومقدرها، أنتَ مسئوليتك تذاكر وتنجح وتجيب مجموع فى حين مسئولية غيرك إنه يتعب فى شغله علشان يساعد نفسه أولاً ويساعد الناس اللى حواليه ثانياً، ومادام ماقدرتش حجم مسئوليتك دلوقتى هوريك مسئولية غيرك علشان تقدر تعب الناس وكمان تقدر مسئوليتك اللى اشبه بلعب العيال اللى انتَ كنت فيها
ثم اكمل بهدوء
_ومش محتاج اقولك إن شغلنا بيعتمد عليه حياة الناس ف مش عاوز غلطة، ودلوقتى على اوضتك إلبس
نظر له مالِك بحزن وحول انظاره جهة والديه ولكنهما أبعدا وجهيهما عنه فى حين قال آدم بحزم
_أنا قولت ايه؟ يلا مفيش وقت