تغاضى عن صراخها الذى يصم أذنيه وحدتها التى تضايقه والتى وللعجب اصبح يعتاد عليها ليجيبها بهدوء مفتعل
_هى الناس بتتضايق لما بتترقى
_بالكوسة؟؟!!
صرخت بها بتعجب ليُعيد هو كلمتها بتعجب مماثل ثم تساءل
كوسة؟؟!! انتى متأكدة انك سليلة عيلة عريقة
_عريقة ايه هو حد قالك انى جاية من سلالة الملوك
قالتها بسخرية لتكمل بسخط
_قصره انا مش منقولة من مكانى مش كوسة هى
_يادى النيلة على الكوسة والزفت اللى مسكتى فيها
قالها بسخط ليكمل بغضب احتد لديه
_من الاخر كدة يا علياء قعاد فى القسم اللى انتى فيه مش هيحصل انتى عماله تخبطى فى الكبير قبل الصغير ومش هترتاحى غير لما تقفلى الجريدة دى
صرخت باستنكار مشوب بالسخرية
_قوم بدل ما تدينى لفت نظر تقوم مرقينى ده على كدة مفيش منك أتنين يا أستاذ منصور
_علياء
صرخ بها بغضب لتجيبه بغضب حاد
_أنا هنا علياء بكر وبس مش علياء الدوينى، لو كنت عاوزة كنيتى دى كنت اشتغلت فى أكبر جريدة فى البلد أو كنت فتحت واحدة مخصوص لكن انا هنا علياء وبس
ثم رفعت اصبعها بتحذير مكملة بحدة وان هدأ صوتها قليلا
_أنا مش هسمح بإن حد يتدخل فى حياتى وإن كان على التمويل ده هو الرشوة يبقى انا هسيب الجريدة دى واروح لأى واحدة، دول على قفا من يشيل واشبعو أنتو ببعض