صمت لتحتد عيناه اكثر ثم صرخ بغضب وهو يضرب على سطح مكتبه بقوة
_ حتى شريك حياتها انتو اللى بتختاروه نيابة عنها وتقررو انها تتجوزو، هتفضلو لحد امتى تتحكمو فى حياتها ولاغيين قراراتها وناسيين انها بنى آدمة ومن حقها تعرف اللى يخصها؟
ان كنت حضرتك بتحبها اوى كدة روح لحد عندها وفهمها كل حاجة وليها حرية الاختيار والقرار، من حقها تعرف انها متحاوطة بالخطر، ومن حقها تختار خط سير حياتها وكفاية عليها اوى لحد كدة، لكن اللى بتعملوه دة حرام، هى مش لعبة فى ايد حد
صرخ عبد الرحمن بغضب
_وانتَ محموج عليها جوى اكدة ليه تكونش حبيتها؟
اتسعت عينيه بصدمة من كلمات جده ليتشنج جسده لا اراديا بالرفض ثم صرخ بعدها بغضب أعمى
_حبيت ايه وزفت ايه، انا محموء عليها لانها انسانة وليها حق اختيار حياتها، حضرتك لما جيت عاوز تجوزهالى اخدت رأيى ولو موافقتش قلت هتعرض على الشباب، يعنى احنا لينا حق الاختيار، طيب وهيا؟
مش واخد بالك انها ليها حق زينا برده؟ ومش واخد بالك انها من حقها تختار الانسان اللى عاوزة تتجوزه؟ وامتى تتجوزه؟ جوازها حقها وباختيارها مش بمزاجك ولا بمزاج والدها
ثم نظر له قائلا بغضب
_ الحاجة اللى متتمنهاش لاحفادك متتمنهاش ليها، يمكن متتفقش مع الانسان اللى هتختاره انت