مطت شفتيها تجيبه ببساطة
_اهز صورته فى السوق والمنافسة
هز رأسه بتخوف من ردة فعلها وللحق هى لم تخلف ظنه حيث سرعان ماتحقق اسوأ مخاوفه وهو يجدها تنتفض بغضب صارخة وهى تضرب سطح مكتبه بغض
_انسى.. انسى يا استاذ منصور مش انا اللى اعمل كدة، طبعا حضرتك بابا بيمولك ف بتحاول تساعده لكن انا مش وسيلة، ان كنت هتكلم يبقى هنشر بقلم نضيف عن الاتنين لكن لو هركن لواحد فيهم يبقى دى صحافة صفرا وانا ماليش فيها، ادامك فى المكتب كتير لكن انا لا، بعد اذنك
ثم تركته وذهبت صافقة الباب خلفها بقوة تردد صداه فى ارجاء المؤسسة كافة لينظر هو فى اثرها بتعجب وهو يقول متسائلا
_هى البنت دى بجد بنت بكر ولا انا غلطان؟ دى مش عاوزة تساعده بنكلة، ايه العيال دى!!
ـــــــــــــــــــــــــــــــــــــــــــــــ
تحرك ليدخل غرفته، دق الباب ليسمع صوته يأذن له بالدلوف، دخل للغرفة ليجده كالعادة منكب على عمله بكل اهتمامه وتركيزه ليقول بهدوء لم يخلو من العتاب وهو يتحرك للجلوس امامه
_كالعادة منطوى على نفسك جدام الكمبيوتر بتاعك وأوراجك ورافض التعامل
ابتسم ساخرا وهو يعود بنظره للاوراق امامه قائلا بهدوء
_اعمل ايه يا جدى؟ انا يوم مافكرت اتعامل كنت هتسبب فى موت حد يبقى خلينى لوحدى احسن لا أأذى حد ولا حد يأذينى وبعيد عن المشاكل اللى دايما انا طرف فيها بدون ما اعمل حاجة حتى