على الرغم من اتساع ابتسامته التى يتماسك لئلا تصبح قهقه كبيرة الا انه اومأ برأسه يؤكد كلامه، نعم هو لا يستبعد شئ على جده، يستطيع فعل ذلك وأسوأ ايضا اذا علم ان احد احفاده قد يُضيع تعبه او انه قد يسبب له سخرية فهو على استعداد تام على دفنه حيا وهذه هى الحقيقة المُرة لجده والتى يخشاها الجميع وبالاخص هو، فهو يرتعب على اخيه بشدة بالاخص حينما طلبه جده للذهاب الى هناك،
الوقوع فى يدى عبد الرحمن المنشاوى امر لا يتمناه بالفعل لألد اعدائه، افاق على صوت ذلك المرتعب امامه وهو يقول بتعب
_مش عارف اقول ايه على الرغم من ان الكل بيصر ان آدم شبه جدى فى كل حاجة الا انى شايف ان فيه اختلاف كبير
التف اليه ماجد بنظره مطالبا التوضيح ليكمل بهدوء
_هو اه شبه جدى فى انه بتاع شغل ويقدر يشيل العيلة كلها ويشيل همها لكن فيه اختلاف… اختلاف محسوس تقدر تحسه
_ازاى؟؟
اجابه ببساطة
_يعنى آدم اه ليه اسلوبه فى العقاب بس مش زى جدى، آدم على الرغم من انه بيمتلك نفس الهيبة اللى بيمتلكها جدى رغم انه ممكن ميكونش فتح بؤه لكن هو نهار مايعاقب بيبقى زى كدة
ثم اشار للملفات امامه وهو يكمل بتوضيح
_يعنى بيبقى عقاب وتعليم فى نفس الوقت، يعنى تقويم، بتلاقى نفسك حتى وانت متعاقب طالع بإستفادة مش مجرد عقاب