نظر له وهو يجيبه
_مفيش
ضحك وهو يقول بهدوء
_مالِك مش عليا انا الكلام ده فيه ايه؟ ده انت مش طايق نفسك
نفخ مالِك بفمه بضيق ليجلس وهو ينظر له قائلا بضيق شديد
_بصراحة آدم زودها المرة دى اوى، يعنى الموضوع مش مستاهل كله ده
ثم اشار للاوراق المتراكمة امامه ليهتف بحزن
_رمانى فى المكان هنا وفوق دماغى كل الشغل ده، حرام بجد ده كله، فيه ايه هو مش مراعى حتى انى لسة صغير ومدرستش حاجة لسة فى الليلة دى كلها
ثم ضرب الاوراق بيده صارخا بغضب طفولى
_وبصراحة بقى انا عامل زى التايه ومش فاهم حاجة
ارتفعت ضحكات الاخر مجلجلة ليصرخ به بضيق
_ماجد!!
نظر له ماجد قائلا برزانة
_بصراحة انا شايف ان آدم معاه حق، يعنى انت بصراحة يعنى يا مالِك متعبتش ومجتهدتش فهو بيوريك التعب على اصوله
ثم زم شفتيه ليجيبه بنبرة ذات مغزى
_وبعدين هو بيوريك ايه اللى هيحصل لو مأسستش شغل خاص بيك ايه اللى هيحصل، يا اما هتشتغل معاه هنا وده فى احسن الظروف او يا اما لو فضلت على وضعك هيشحنك على البلد
اتسعت عيناه برعب ليهز رأسه بالنفى قائلا
_لا متقولش.. مستحيل آدم يعمل كدة، هيبعتنى لجدى؟
نظرة واحدة من الاخر أكدت ظنونه ليهز رأسه بالنفى رعبا وهو يقول
_لا استحالة.. عبد الرحمن المنشاوى لا، ده لو وصله ان انا مش تاعب نفسى ونايم مش بعيد يربطنى وينيمنى فى الزريبة مع البهايم وخصوصا لو لقدر الله سقطت فى امتحان ولا حاجة