_العلم مفيهوش احسن واجل، العلم اننا نطور نفسينا يا ام سليم، انا اه بعترف انى دكتور شاطر بس العلم ما بيجفش عند حتة معينة، لازم اتعلم واتدرب اكتر، لازم اقرا كتير واتعلم اكتر، اطلع مؤتمرات كتير واطور نفسى، وكل اما الاجى فرصة اتعلم منها اتعلم، عالم الطب واسع يا امى ولازم نفضل على تطور معاه
صمت لبرهة ليبتسم برقة وهو يقول بفخر:
_كيف آدم اكدة، آدم ما اكتفاش بالكلية ولكن عمل ماجيستير ودكتواره فى المانيا رغم سنه الصغير، اتعلم كتير وعمل شركته ومازال لحد دلوجتى بيطور نفسه ويطور علمه علشان يكون افضل ويكون فى القمة، آدم اكبر دليل على التطور والطموح وفى يوم من الايام هيكون صاحب واحدة من اكبر شركات الادوية فى العالم واللى ليها اسمها
ثم اعاد بعينيه جهة والدته يكمل بجدية قاطعة:
_وآدم ماهواش احسن منى، انا عاوز اكون واحد من افضل چراحين العالم ان مكنتش افضلهم، لازم اسم سليم المنشاوى يكون فوج
ضحكت سميرة بمرح لتمسح دموعها وهى تكمل بجدية مرحة:
_طول عمركم اكدة، طول عمرك حاطط آدم هدف ليك وبتتحداه على الرغم من انه اصغر منيك ب اربع سنين الا انك كنت حاطه هدف ومنافس ليك
ابتسم سليم ليجيبها بجدية:
_مش انا لوحدى اللى حاطط ادم منافس ليا، كلنا حاطينه اكده، سواء انا او حاتم او حتى ماچد بس ماجد واخده صديق اكتر لكن احنا منافسين ليه